Riba djárason 28 di òktober Entidat Públiko Boneiru ta organisá un Ekspo Medio Ambiente atrobe pa empresa. E aña akí e ekspo ta intenshoná pa komèrsio por detal, komèrsio por mayor i fasilidatnan pa almasená produkto friu i kongelá. Tur hende ta bon biní for di 14.00 or te 17.00 or na Jong Bonaire.
For di 1 di aprel 2024 tin regla nobo di medio ambiente pa empresa na vigor. Na e ekspo empresarionan ta tende kiko esakinan ta nifiká pa nan i kua ta e medidanan ku nan mester tuma. Esaki ta tuma lugá den tres presentashon. E promé ta bai tokante e Dekreto di Establesimentu i Aktividat BES, ku ta kontené e reglanan nobo di medio ambiente. Despues ta sigui e Programa Maneho Sostenibel di Sushi Boneiru, tokante un mihó manera pa anda ku sushi na nos isla. Finalmente bo ta tende kon Entidat Públiko Boneiru ta kontrolá si empresanan ta kumpli ku e palabrashonnan: e maneho di mantenshon di lei.
Banda di esei tin un diskushon di foro, kaminda bishitantenan ta papia ku gobernantenan lokal tokante algun ponensia. Na e bolsa empresanan ta demostrá solushonnan pa sushi, awa sushi i sparmentu di koriente, manera panel solar. Tin hopi tempu tambe pa establesé kontakto i interkambiá informashon.
“Ku e ekspo akí nos ke tene Boneiru limpi i saludabel, huntu ku e empresarionan,” segun e mènedjer di programa Leendert de Jong. “Nos sa ku hopi empresa ta haña ku ta difísil pa nan sa kiko ta ferwagt di nan. Kiko bo mester hasi? Na unda bo ta kuminsá? I kua ta e solushonnan ku tin na nos isla kaba? Nos ta preferá pa adelantá duna klaridat huntu, ku despues nos tin ku mantené lei.”
Sòru pa bo empresa ta bon prepará i registrá via https://forms.gle/QieW2fSH1iEdcsc3A.
