Sekshon di Kultura Arte Literatura ‘SKAL’ ta invitá pueblo henter di Boneiru na su aktividat anual yamá É Chispa di Wan ku Pedu. E Chispa di Wan ku Pedu 2022 ta tuma lugá djasabra 18 di yüni na parke Patun Saragoza na Antriol Pariba entre 6or pa 10or di anochi. Meta di e evento akí ta pa duna inisio na e periodo di San Juan i San Pedro, dos fiesta kultural ku ta tuma lugá 24 i 29 di yüni.
E Chispa di Wan ku Pedu e aña aki ta konta ku animashon musikal di Foyan Boyz, Grupo Méksiko huntu ku algun kantante invitá. E aña akí SKAL ta inová su selebrashon di Wan ku Pedo ku entrega di un flambeu na 5 persona ku ta kanta i toka ora ta selebrá dia di San Juan i San Pedro. Diputado di kultura Nina Den Heyer lo deklará e periodo di San Juan ku San Pedro 2022 habrí, esaki den forma simbóliko di sende e promé flambeu. Mas ku klaro tambe lo tin e demostrashon di e tan gustá bulamentu di kandela. Durante e aktividat aki di Chispa di Wan i Pedo lo graba live.
Selebrashonnan tradishonal
Segun tradishon den diferente bario aki na Boneiru, ta selebrá e fiestanan kultural San Juan i San Pedro riba dianan 24 i 29 di yüni, inisiando ya for di bispu di e dianan. Djaweps 23 di yüni tin selebrashon di San Juan den barionan Rincon, Nort Saliña, Antriol i Nikiboko ku Tera Cora. Djamars 28 di yüni den mesun barionan e selebrashon di San Pedu ta tuma lugá. SKAL ta konta ku e aña akí atrobe den tur bario e selebrashonnan di tantu San Juan komo San Pedro lo ta grandioso. Demostrando asina ku nos pueblo sa kon pa mantené bibu su fiestanan kultural i folklóriko.