Dia Internashonal di Hende Hòmber: atenshon pa salú i bienestar di hende hòmber

Selebrashonnan 19 Novèmber 2026

Riba e dia spesial aki, diputado di Komunidat i Kuido Timoteo Silberie ta ekspresá su apresio pa e aporte importante di hende hòmber na nos komunidat.

Entidat Públiko Boneiru ta deseá tur hende hòmber un felis dia. Riba e dia spesial aki, diputado di Komunidat i Kuido Timoteo Silberie ta ekspresá su apresio pa e aporte importante di hende hòmber na nos komunidat. Na mes momentu, e ta pidi atenshon pa nan salú físiko i mental, pa nan bienestar i pa importansia di un bon sosten pa hende hòmber i mucha hòmber na Boneiru.

Hende hòmber ta desempeñá diferente ròl importante den nos komunidat, komo tata, pareha, kolega, boluntario, entrenador i mèntòr. Sin embargo, hopi hende hòmber ta sinti preshon pa semper mustra nan mes fuerte, solushoná nan problemanan nan so i no ekspresá nan emoshonnan. Esaki por hasi mas difísil pa nan buska yudansa ora nan ta enfrentá strès, problema ku salú, difikultat finansiero òf problema personal.

“Ser fuerte no ta nifiká ku bo mester karga tur kos bo so. Fortalesa berdadero ta nifiká tuma responsabilidat, kuida bo mes bon, tene kurashi pa pidi yudansa i ta presente pa bo famia i bo komunidat,” asina diputado Silberie a deklará.

Pa mucha hòmber i hende hòmber yòn tambe ta importante pa nan tin bon ehèmpel i pa nan lanta den un ambiente seif kaminda nan por ekspresá nan mes, siña i desaroyá. Mayornan, skolnan, organisashonnan deportivo i komunidat en general ta hunga un ròl importante den esaki. Huntu nan por kontribuí na un generashon di hende hòmber ku ta kuida nan mes bon, anda na un manera respetuoso ku otro i asumí responsabilidat.

Diputado Silberie ta hasi un yamada na tur hende hòmber pa duna atenshon na nan salú físiko i mental, pa papia ku otro i pa buska yudansa ora esaki ta nesesario. Na mes momentu, e ta enkurashá komunidat pa no solamente enfatisá riba e responsabilidatnan di hende hòmbernan, sino tambe rekonosé nan nesesidat di komprenshon, guia i sosten.

Entidat Públiko Boneiru ta felisitá tur hende hòmber ku nan dia i ta gradisí nan pa nan aporte na nos komunidat.