GGD Bonaire / Salubridat Públiko di Entidat Públiko Boneiru a lansa e kampaña Nothing Nada Nix18. Ku e kampaña akí ta pone atenshon na e riesgonan di uso di alkohòl bou di 18 aña. E kampaña ta dirigí su mes riba hóben, mayor, miembronan di famia i otro adulto.
E lansamentu ofisial na Boneiru a tuma lugá awe, 14 di òktober 2026, ku desvelo di e mural di Nothing Nada Nix18. Na e lansamentu tabata presente diputado Timoteo Silberie, señora Sulay Lau na nòmber di ministerio di Salubridat Públiko, GGD Bonaire / Salubridat Públiko, partnernan i otro organisashonnan enbolbí.
Tur hende tin un ròl
Aunke hóbennan ta siña hasi eskoho konsiente nan mes, nan no ta nan so. E kampaña Nothing Nada Nix18 na promé lugá ta dirigí su mes riba e ròl krusial di ambiente. Mayornan, pero tambe miembronan di famia, skolnan, organisashonnan i otro adultonan por kontribuí na un ambiente den kua hóbennan por krese na un manera sano i sigur. Dunando bon ehèmpel i papia ku hóbennan tokante alkohòl, adultonan por sostené hóbennan pa hasi eskoho saludabel.
E mensahe ku imágen i muzik
Nothing Nada Nix18 ta adaptashon karibense di e kampaña NIX18. A desaroyá e kampaña ku aporte di e region karibense i ta present’é na Boneiru, Sint-Eustatius, Saba, Aruba, Kòrsou i Sint-Maarten. Transmitiendo huntu e mesun mensahe, e islanan ke yega na hóben- i adultonan na un manera ku nan por rekonosé.
Un parti importante di e kampaña ta un kantika i videoclip ku ta disponibel na papiamentu, hulandes i ingles. Via muzik i imágen ta transmití e mensahe na un manera aksesibel. E videoclip ta bai tokante e konsekuensianan di uso di alkohòl na edat yòn i tin komo ophetivo stimulá un kòmbersashon tokante esaki.
Bo ke sa mas tokante Nothing Nada Nix18 i mira e video di kampaña? Bai e ora ei na nos página di lansamentu: bonairegov.com/pa/kampananan/campagne/nothing-nada-nix18
E mensahe ta:
Nothing. Nada. Nix.
No bebe alkohòl bou di 18 aña.
