Entidat Públiko Boneiru pa 1 fte ta buskando un kolega nobo ku ta entusiasmá, motivá i inovativo. Abo ta e kolega resiliente pa futuro ku nos ta buska?
Kiko bo ta bai hasi?
Komo Hurista di Privasidat bo ta garantisá ekspertisio hurídiko di privasidat den Entidat Públiko Boneiru. Bo ta evaluá prosesonan i solushonnan (digital) nobo i eksistente pa loke ta trata legislashon di privasidat i bo ta duna konseho tokante problemátikanan hurídiko di privasidat.
Bo ta evaluá entre otro formularionan, konekshonnan di dato i aplikashonnan relashoná ku DigiD i rekonosementu elektróniko a base di perspektiva di privasidat i AVG (ordenansa general di protekshon di dato). Bo ta señalá riesgonan hurídiko i bo ta duna konseho tokante e medidanan ku ta nesesario pa garantisá privasidat na un manera kuidadoso den entre otro dunamentu di servisio digital.
Den esaki bo ta traha estrechamente huntu ku tur direktorado i e Tim di Programa Transformashon Digital i bo ta sinkronisá ku JAZ tokante e kuadronan hurídiko aplikabel.
Kiko ta e eksigensianan
Pa e funshon akí nos ta buskando un profeshonal hurídikamente fuerte ku konosementu komprobabel di privasidat i protekshon di dato. Bo por tradusí kuadronan hurídiko den e práktika diario di dunamentu di servisio digital i bo por rekonosé riesgonan tempran. Bo ta duna konseho na un manera klarito i práktiko, i bo por hasi problemátikanan hurídiko komprendibel pa koleganan sin bèkgrount hurídiko. Banda di esaki bo ta kumpli ku e siguiente eksigensianan:
- Bo ta disponé di un formashon kompletá na nivel di WO den un direkshon hurídiko;
- Bo tin minimalmente 3 aña di eksperensia di trabou relevante;
- Bo tin konosementu komprobabel di lei di privasidat, manera Wbp BES;
- Bo tin eksperensia ku evaluashon hurídiko di prosesonan digital, prosesamentu di dato i konekshon di dato;
- Konosementu di DigiD, rekonosementu elektróniko i servisio digital ta un bentaha;
- Bo por rekonosé riesgonan hurídiko i di privasidat, i tradusí esakinan den konsehonan i medidanan konkreto;
- Bo ta disponé di un bista analítiko i hurídiko fuerte;
- Bo ta traha na un manera kuidadoso, íntegro i independiente;
- Bo por splika problemátikanan hurídiko kompleho na un manera klarito na koleganan no-hurídiko.
- Eksperensia den un organisashon di gobièrnu nos ta apresiá hopi, preferibelmente eksperensia ku problemátikanan di privasidat relashoná ku servisio digital;
- Un sertifikashon òf formashon riba tereno di privasidat (manera CIPP/E òf un formashon di funshonario pa protekshon di dato) ta un bentaha.
Pa por traha na Entidat Públiko Boneiru, un eksigensia ta, ku banda di e kondishonnan menshoná akí riba, bo ta kumpli tambe ku loke tin deskribí akí bou.
- Bo ta papia i skirbi hulandes bon;
- Bo ta papia papiamentu òf bo ta dispuesto pa siña esaki dentro di un aña;
- Bo por traha bon ku sistemanan digital.
Bo ta rekonosé bo mes den un gran parti di e profil akí, pero bo no ta kumpli ku tur eksigensia? E ora ei tuma kontakto libremente ku Recruitment. Gustosamente nos ta wak bo profil total.
Loke nos ta ofresé bo
Na Entidat Públiko Boneiru nos ta haña apresio importante. Bo ta ripará esaki na bo sitio di trabou, pero tambe den e kondishonnan laboral ku nos ta ofresé. Bo por konta ku:
- Un salario ku ta kuadra ku e funshon, kaminda nos ta tene kuenta ku bo konosementu i eksperensia relevante;
- Sèn di fakansi di 8,33%;
- Un ‘13ᵉ maand’ kompleto;
- 168 ora di vèrlòf i 5 dia èkstra di vèrlòf stipulá adelantá;
- Un areglo di penshun ekselente;
- Un siman di trabou fultaim di 36 ora;
- Un nombramentu a base di proyekto ku un durashon di minimalmente 1 aña.
E salario ta a base di bo formashon, abilidat i eksperensia. Repartishon di bo siman di trabou ta fleksibel i lo keda stipulá den konsulta ku bo hefe. Banda di esei nos tin algun otro kondishon laboral sekundario atraktivo, tokante kua gustosamente nos ta konta bo mas durante bo prosedura di solisitut!
Loke ta importante tambe pa sa
- Un assessment ta forma parti di e prosedura di solisitut;
- Bo mester por entregá e diplomanan ku bo a logra, i ku ta menshoná den bo CV;
- Bo mester por entregá un deklarashon tokante kondukta (VOG).
Sí! Mi ke e trabou akí
Nos ta anhelá pa risibí bo solisitut. Manda bo CV huntu ku bo motivashon promé ku 6 di novèmber na solliciteren@bonairegov.com.
Bo tin duda ainda òf bo ke haña mas informashon tokante e funshon? E ora ei tuma kontakto ku Recruitment via (+599) 715 5330. Pa mas informashon tokante Entidat Públiko Boneiru bo por bishitá www.bonairegov.com.
