Konstrukshon òf renobashon di waf den parke bou di laman di Boneiru tin impakto riba naturalesa i pa e motibu akí tin regla spesial.
Kiko e produkto òf servisio aki ta nifiká?
Bo no tin mag di konstruí sin pèrmit den e área di kosta.
E zona di kosta ta e área kaminda tera i laman ta topa ku otro.
Esaki ta un área importante, pero tambe vulnerabel.
Pa e motibu akí, banda di e reglanan normal di konstrukshon ku ta konta pa henter nos isla, tin regla adishonal ku ta na vigor den e zona di kosta.
Bo ke konstruí òf renobá algu den e zona di kosta, ménos ku 15 meter for di e liña ku ta indiká e nivel mas haltu di laman? Por ehèmpel un waf, un muraya, un dèk òf un trapi ku ta bai laman?
E ora ei bo tin mester di vários pèrmit:
- Un pèrmit di naturalesa, ku bo tin ku pidi na Entidat Públiko Boneiru.
- Un pèrmit di konstrukshon, ku bo tin ku pidi na Entidat Públiko Boneiru.
- Un pèrmit konforme e Lei maneho marítimo BES, ku bo por pidi na Rijkswaterstaat.
Prohibishon pa konstruí sin pèrmit di naturalesa
A traha regla pa protehá nos naturalesa den zona di kosta kontra konsekuensianan di konstrukshon. No ta pèrmití pa konstruí sin un pèrmit di Kolegio Ehekutivo den e zona di kosta. E reglanan akí ta den e Dekreto Insular Parke Bou di Laman Boneiru (2010), paragraf VII: https://lokaleregelgeving.overheid.nl/CVDR40370.
Kon bo por pidi esaki?
Nos ta trata bo petishon konforme artíkulo 19 di e Ordenansa insular maneho di naturalesa Boneiru (2008).
Bo por lesa e teksto kompleto akinan: https://lokaleregelgeving.overheid.nl/CVDR7367
Akí bou tin e pasonan i kondishonnan pa entregá un petishon:
1) Entregá petishon
Bo mester entregá un petishon por eskrito pa un pèrmit di naturalesa i eventualmente pa un pèrmit di konstrukshon tambe na Kolegio Ehekutivo di Entidat Públiko Boneiru. Bo por entregá e petishonnan akí na bali di Direktorado di Planifikashon i Desaroyo na Kaya Grandi 56-58 òf pa medio di e formulario elektróniko riba e wèpsait akí.
Pareu ku esaki bo por entregá e petishon a base di e Lei maneho marítimo BES na Rijkswaterstaat.
2) Dokumentunan obligatorio
Añadí e siguiente dokumentunan serka bo petishon pa un pèrmit di naturalesa:
- Un formulario di petishon kompletamente yená.
- Un kopia di un prueba bálido di identidat.
- Un kopia di e petishon pa un pèrmit di konstrukshon.
- Un mapa di konstrukshon den formato Autocad.
- Un komprobante di pago di e leges di naturalesa di $ 14.
- Un akta di propiedat òf un otro prueba ku bo ta doño.
- Un dokumentu ku e midínan for di e liña ku ta indiká e nivel mas haltu di laman, ku bo tin ku pidi na Kadaster.
- Informashon tokante e posibel efektonan di bo proyekto riba naturalesa, manera rapòrt i estudio di medio ambiente.
- Mapa òf pintura ku ta klarifiká e área i e magnitut di e trabounan.
Dokumentu adishonal den kaso di renobashon: kopia di e pèrmit bieu.
Dokumentu adishonal den kaso di un waf nobo: hasi petishon pa un pèrmit promé na Rijkswaterstaat.
3) Bo petishon ta keda registrá i bo ta risibí un konfirmashon di esaki.
4) Informashon komplementario
Si falta informashon, Kolegio Ehekutivo por pidi bo pa entregá informashon komplementario.
5) E término di tratamentu di bo petishon ta kuminsá for di e fecha riba kua segun wisio di Entidat Públiko Boneiru bo petishon a keda entregá kompletamente. Akí bou mas tokante e término.
Ku ken bo por tuma kontakto?
Pa pregunta bo por manda un email na natuurvergunningen@bonairegov.com.
Kuantu tempu e ta tuma?
Dentro di 90 dia despues di a risibí e petishon, Kolegio Ehekutivo ta tuma un desishon tokante otorgamentu di e pèrmit òf eksonerashon, despues ku nan a pidi konseho serka e Komishon Maneho di Naturalesa Boneiru. Mas tokante e komishon akí bo ta lesa den artíkulo 3 di e Ordenansa Insular Maneho di Naturalesa Boneiru.
Kuantu e ta kosta?
Hasi petishon pa un pèrmit di naturalesa ta kosta $14,00.
Por paga e gastunan akí na bali di ofisina di Registro Sivil i por hasi esaki alabes pa medio di un transakshon na MCB riba e kuenta di banko number 30100203 na nòmber di Entidat Públiko Boneiru.
Bo no ta di akuerdo ku e desishon?
Mester publiká e petishon pa un pèrmit di naturalesa i durante 14 dia e mester ta disponibel pa tur hende tira bista aden. Durante e periodo pa tira bista den e petishon, interesadonan por duna nan opheshon di konosé na Kolegio Ehekutivo. Na momentu ku Kolegio Ehekutivo ta tuma desishon riba e petishon, nan mester tuma e opheshonnan akí na konsiderashon. Dentro di 6 siman despues di fecha di e desishon, bo por duna bo opheshonnan di konosé na Kolegio Ehekutivo òf bai den apelashon na Korte di Prome Instansia kontra un desishon riba e petishon.
Ki lei i regla ta konta aki?
Unda bo por haña mas informashon?
Kiko nos ta hasi ku bo datonan personal?
Si bo entregá un petishon òf mèldu algu, Entidat Públiko Boneiru mester di bo dato personal. Entidat Públiko Boneiru ta atendé bo datonan di forma konfidensial.
Den e Lei Protekshon di dato personal BES tin skirbí kon Entidat Públiko Boneiru mester hasi esaki.
E reglanan mas prinsipal ta :
- Entidat Públiko Boneiru ta pidi solamente dato ku mester pa por atendé ku bo petishon òf pa atendé ku loke bo a mèldu.
- Nan ta registrá i prosesá bo datonan di forma seif, konfidenshal i kouteloso.
- Ta usa bo datonan solamente pa e petishon òf loke bo a mèldu, òf pa algu ku tin direktamente di aber ku esei.
- No ta warda bo datonan mas largu di loke ta nesesario pa e petishon òf loke bo a mèldu.
- Otro organisashon ta haña bo datonan solamente si esei mester segun lei.
- Bo por puntra pa kua fin ta usa bo datonan i kiko ta hasi ku nan.
