Dekreto di Establesimentu i Aktividat (IAB BES) ta kontené reglanan di medio ambiente pa empresanan na Boneiru. Den e reglanan akí ta menshoná loke empresanan mester hasi pa prevení daño na medio ambiente.
Kiko e produkto òf servisio aki ta nifiká?
Bo tin un empresa na Boneiru? E ora ei bo tin ku tene bo mes na e reglanan di medio ambiente den IAB BES. E reglanan akí tei pa protehá naturalesa i medio ambiente di Boneiru.
Den IAB BES tin reglanan di medio ambiente pa empresanan na Hulanda Karibense. Den IAB BES ta yama empresanan ‘establesimentu/inrichtingen’.
Meta di e reglanan akí ta pa duna mihó protekshon na naturalesa i medio ambiente na Boneiru.
Empresanan mester organisá nan operashonnan relashoná ku eliminashon di residuo, e manera pa deshasí di awa sushi i otro aktividatnan ku ta afektá medio ambiente di tal manera ku no ta hasi daño na medio ambiente. Bo mester prevení daño na medio ambiente òf limitá esaki mas tantu posibel. Esaki yama obligashon di kuido.
Ta repartí empresanan den kuater tipo:
- Tipo 1: pa e empresanan akí ta konta reglanan general, no mester di notifikashon.
- Tipo 2: pa e empresanan akí ta konta reglanan general, notifikashon ta obligatorio.
- Tipo 3: mester di pèrmit di Entidat Públiko Boneiru, den e pèrmit ta deskribí loke mester kumpli kuné.
- Tipo 4: mester di pèrmit di Reino, den e pèrmit ta deskribí loke mester kumpli kuné.
Bou di kua tipo bo empresa ta kai, ta dependé di e aktividatnan di bo empresa i e impakto riba medio ambiente.
Tipo 1 i 2 ta empresanan ku poko impakto riba medio ambiente, manera un ofisina, restorant òf garashi.
Tipo 3 i 4 ta empresanan ku mas impakto riba medio ambiente, manera un depósito di kombustibel òf un desmantelashon di outo.
- Bo tin un empresa tipo 1? E ora ei bo tin ku tene bo mes na reglanan general.
- Bo tin un empresa tipo 2? E ora ei bo tin ku tene bo mes na reglanan general i promé ku kuminsá, notifiká esaki.
- Bo tin un empresa tipo 3? E ora ei bo ta pidi un pèrmit na Entidat Públiko Boneiru.
- Bo tin un empresa tipo 4? E ora ei bo ta pidi un pèrmit na Reino.
Un outoridat kompetente ta kontrolá si bo ta tene bo mes na regla. Pa empresanan tipo 1, 2 i 3, esei ta inspektornan di Direktorado Supervishon & Mantenshon, ku na nòmber di Kolegio Ehekutivo di Boneiru ta hasi kontròl. Pa empresanan tipo 4, Inspekshon Ambiente di Bida & Transporte ta hasi kontròl na nòmber di minister di Infrastruktura i Maneho di Awa.
Pa mas informashon tokante reglanan di medio ambiente, bishitá e wèpsait di Punto di Informashon di Medio Ambiente: https://infomilcn.com. Aya bo por haña informashon tambe tokante kon hasi notifikashon.
Ki ora bo por pidi esaki?
Pa yena e formulario di notifikashon digital, bo mester di:
- Un ekstrakto di Kámara di Komèrsio di bo empresa.
- Un ekstrakto di Kadaster ku den esei e number kadastral di bo empresa.
- Den kaso di konstrukshon nobo, number di e pèrmit di konstrukshon.
- Un mapa di e empresa.
Kon bo por pidi esaki?
Bo ta hasi bo notifikashon òf petishon via un formulario digital. Den e formulario akí bo ta kontestá algun pregunta. Despues bo ta mira si bo empresa ta tipo 2 òf tipo 3.
- Tipo 2
- Bo empresa ta tipo 2? E ora ei bo ta hasi un notifikashon.
- Ora bo yena e formulario kompletamente i pone e dokumentonan korekto aserka, bo ta risibí konfirmashon via imeil. Bo empresa ta registrá e ora ei temporalmente komo tipo 2.
- Tipo 3
- Bo empresa ta tipo 3? E ora ei Entidat Públiko Boneiru ta tuma kontakto ku bo.
- E persona kompetente ta diskutí e petishon ku bo. Despues ta sigui atendé ku bo petishon.
Ku ken bo por tuma kontakto?
Pa tur bo preguntanan tokante IAB BES, bo por akudí tur dia di trabou entre 08.00-12.00 or na Punto di Informashon na Kámara di Komèrsio. Bo por hasi bo preguntanan tambe online via e wèpsait di Punto di Informashon di Medio Ambiente.
Unda bo por haña mas informashon?
Formularionan
Kiko nos ta hasi ku bo datonan personal?
Si bo entregá un petishon òf mèldu algu, Entidat Públiko Boneiru mester di bo dato personal. Entidat Públiko Boneiru ta atendé bo datonan di forma konfidensial.
Den e Lei Protekshon di dato personal BES tin skirbí kon Entidat Públiko Boneiru mester hasi esaki.
E reglanan mas prinsipal ta :
- Entidat Públiko Boneiru ta pidi solamente dato ku mester pa por atendé ku bo petishon òf pa atendé ku loke bo a mèldu.
- Nan ta registrá i prosesá bo datonan di forma seif, konfidenshal i kouteloso.
- Ta usa bo datonan solamente pa e petishon òf loke bo a mèldu, òf pa algu ku tin direktamente di aber ku esei.
- No ta warda bo datonan mas largu di loke ta nesesario pa e petishon òf loke bo a mèldu.
- Otro organisashon ta haña bo datonan solamente si esei mester segun lei.
- Bo por puntra pa kua fin ta usa bo datonan i kiko ta hasi ku nan.
