Pèrmit pa arma di kandela

Ta prohibí pa bo tin un arma (di kandela) i munishon huntu ku bo òf pa warda esaki. Importashon òf eksportashon di un arma (di kandela) òf munishon pa i for di Boneiru tampoko no ta pèrmití. Den sierto kasonan Gezaghèber por duna un eksonerashon, di manera ku tòg bo tin mag di poseé, importá òf eksportá un arma (di kandela) òf munishon. Esaki por solamente pa sierto motibunan i bou di kondishonnan estrikto.

Kiko e produkto òf servisio aki ta nifiká?

Konsentimentu
Un konsentimentu ta un pèrmit (eksonerashon) pa bo por importá òf eksportá un arma di kandela òf munishon pa òf for di Boneiru. Ora bo kumpra un arma òf munishon i bo ke trese esaki Boneiru, bo tin mester di un konsentimentu.

Pèrmit pa arma (di kandela)
Un pèrmit pa arma (di kandela) ta un pèrmit (eksonerashon) pa disponé di un arma di kandela òf pa bo tin mag di tin esaki huntu ku bo durante ku bo ta ehersé un aktividat spesífiko. Pensa por ehèmpel riba praktikamentu di e deporte di tiru. Un pèrmit pa arma di kandela ta bálido pa 1 aña i mester renobá esaki tur aña.

E metanan
Solamente pa sierto metanan bo por hasi petishon pa un pèrmit pa arma di kandela.
- Pa un arma personal ku bo ta usa na bo klup di tiru;
- Pa protehá bo bestianan ora bo tin un kunuku.

Sierto organisashonnan por hasi petishon pa un pèrmit pa poseé arma di kandela. Solamente den sierto kasonan Gezaghèber ta duna un pèrmit pa arma di kandela. Den esaki tambe tin kondishonnan spesial na vigor.

Ki ora bo por pidi esaki?

Konsentimentu
Pa haña un konsentimentu bo tin ku hasi un petishon na Gabinete di Gezaghèber. Bo por haña un konsentimentu (pa munishon òf pa un arma di kandela) solamente ora ya kaba bo a haña un pèrmit pa arma (di kandela).

Pèrmit pa arma (di kandela)
E kondishonnan pa haña un pèrmit pa arma (di kandela) ta dependé di e meta pa kua bo ta hasi petishon pa e pèrmit.

Deporte di tiru
Pa haña un pèrmit personal pa arma di kandela pa e deporte di tiru, bo mester:

Ta inskribí den registro sivil di Boneiru;
Ta minimalmente 1 aña miembro di e klup di tiru;
Yena i firma e formulario di petishon (kompletamente);
Entregá un Deklarashon tokante Kondukta (VOG). Esaki no tin mag di ta mas bieu ku 3 luna;
Entregá un deklarashon médiko, ku firma i stèmpel di bo dòkter di kas i di e optometrista. Esaki no tin mag di ta mas bieu ku 3 luna;
Entregá resultado di un tèst sikológiko. Esaki no tin mag di ta mas bieu ku 3 luna.
- E kondishon akí ta konta pa e promé biaha ku bo hasi petishon pa un pèrmit pa arma (di kandela), i despues kada 3 aña;
Entregá un deklarashon di e klup di tiru tokante bo abilidat di tiru i siguridat di arma;
Entregá un karta di e klup di tiru ku nan ta di akuerdo ku bo por haña un arma di kandela personal;
Si ta pa promé biaha bo ta hasi petishon pa un pèrmit pa arma (di kandela), bo tin ku entregá tambe un komprobante di kompra (òf un oferta) di e arma di kandela.

Kunuku
Pa haña un pèrmit pa arma di kandela pa protehá bo bestianan, bo mester:

Ta inskribí den registro sivil di Boneiru;
Yena i firma e formulario di petishon (kompletamente);
Entregá un komprobante di kompra (òf un oferta) pa e arma di kandela pa kua bo ta pidi e pèrmit;
Entregá un prueba ku e kunuku ta tereno propiedat òf èrfpagt, òf ku e ta tereno di hür;
Entregá un prueba for di kua ta resultá ku bo ta doño di minimalmente 50 bestia òf mas. Bestia ta enserá kabritu, porko, baka i/òf kabai;
Entregá un Deklarashon tokante Kondukta (VOG). Esaki no tin mag di ta mas bieu ku 3 luna;
Entregá un deklarashon médiko, ku firma i stèmpel di bo dòkter di kas i di e optometrista. Esaki no tin mag di ta mas bieu ku 3 luna.
Entregá resultado di un tèst sikológiko. Esaki no tin mag di mas bieu ku 3 luna.
- E kondishon akí ta konta pa e promé biaha ku bo ta hasi petishon pa un pèrmit pa arma (di kandela), i despues kada 3 aña;
Entregá un deklarashon di abilidat di tiru i di siguridat di arma emití pa polis.

Otro tipo di arma (di kandela)
Sierto ophetonan parse arma di kandela hopi. Pensa riba skopèt di aire òf arma di ‘airsoft’ òf di ‘paintball’. Nan por usa e ophetonan akí pa kometé krímen, inkluyendo menasá òf atraká hende. Pa e motibu akí outoridatnan ta mira e ophetonan akí komo arma di kandela. Pa e ophetonan akí tambe bo tin mester di un pèrmit pa arma (di kandela).
Ta duna un pèrmit pa arma di kandela pa skopèt di aire, i arma di ‘airsoft’ i/òf di ‘paintball’ solamente si bo ta miembro di un klup di tiru ku Minister di Hustisia di Siguridat a rekonosé. Bo no tin mag di usa e armanan akí pafó di tereno propio òf pafó di un klup. Esaki ta konta tambe pa bog ku flecha (kruisboog).

Mas informashon tokante e kondishonnan pa un pèrmit pa arma (di kandela) pa un di e tiponan akí, bo ta haña den e maneho di arma (di kandela) Boneiru.

Pèrmit general pa arma
Ora un organisashon ta disponé di arma, e tin mester di un pèrmit general pa arma. Por haña e kondishonnan pa un organisashon den e Maneho di arma (di kandela) Boneiru. Ta duna un pèrmit general pa arma tambe pa un (1) aña i mester renobá esaki tur aña.

Kon bo por pidi esaki?

Pa hasi petishon pa un konsentimentu
Ta entregá un petishon pa konsentimentu pa importashon, eksportashon òf transporte di arma di kandela òf munishon por lo ménos dos (2) siman promé ku e fecha di importashon, eksportashon òf transporte.

Semper ta entregá un petishon pa un konsentimentu por eskrito hasiendo uso di e formulario di petishon (legalmente stipulá). E formulario ta físikamente disponibel na Gabinete di Gezaghèber òf por download esaki via wèpsait di entidat públiko Boneiru.

Por entregá un petishon na Gabinete di Gezaghèber, Kaya Grandi 30, òf via email na wapenmachtiging@bonairegov.com.

Na momentu di entrega ta kontrolá un petishon pa konsentimentu pa wak si e ta kompletu. Ta tuma solamente petishonnan kompletu den tratamentu. Un petishon ta kompletu ora e formulario ta yená kompletamente i firmá, i ora tur dokumentu nesesario ta añadí huntu ku esaki.

Dentro di 2 siman ta disidí tokante un petishon pa un konsentimentu ku a tuma den tratamentu.

Pa hasi petishon pa un pèrmit pa arma (di kandela)
Ta entregá un petishon pa un pèrmit pa arma (di kandela) por eskrito hasiendo uso di e formulario di petishon (legalmente stipulá). Dependiente di meta di e petishon, mester añadí sierto aneksonan tambe serka e petishon.

E formulario ta físikamente disponibel na Gabinete di Gezaghèber òf por download esaki via wèpsait di entidat públiko Boneiru.

E petishon mester ta kompletu
Na momento di entrega ta kontrolá un petishon pa pèrmit pa arma (di kandela) pa wak si e ta kompletu. Ta tuma solamente petishonnan kompletu den tratamentu. Un petishon ta kompletu ora e formulario ta yená kompletamente i firmá, i ora tur dokumentu nesesario ta añadí huntu ku esaki.

Por entregá un petishon na Gabinete di Gezaghèber, Kaya Grandi 30, òf via email na wapenmachtiging@bonairegov.com.

Término pa tuma desishon
Dentro di 4 siman ta disidí tokante un petishon pa un pèrmit pa arma (di kandela) ku a tuma den tratamentu.

Periodo pa petishon pa prolongashon di pèrmit pa arma (di kandela)
Ta duna un pèrmit pa durashon di un aña kalendario. Pa kada aña kalendario nobo mester hasi un petishon nobo (un petishon pa prolongashon). Pa esaki bo ta yena e formulario di petishon di nobo i bo ta manda e aneksonan korespondiente huntu ku esaki.

Por entregá un petishon pa prolongashon tur aña entre 1 di sèptèmber i 15 di òktober.

Un di e eksigensianan den kaso di un petishon pa un pèrmit pa arma (di kandela) ta un Deklarashon tokante Kondukta (VOG). Den kaso di un petishon pa prolongashon semper mester entregá un VOG ku no ta mas bieu ku 3 luna. Ta hasi petishon pa e Deklarashon tokante Kondukta (VOG) na Gabinete di Gezaghèber. Pa fasilitá e personanan ku ta hasi petishon, ta ofresé e posibilidat pa entregá e petishon pa Deklarashon tokante Kondukta (VOG) i e petishon pa prolongashon di pèrmit pa arma (di kandela) na mes momentu. Den kaso ku otorgá e petishon pa Deklarashon tokante Kondukta (VOG), e ora ei mesora i outomátikamente ta tuma e petishon pa prolongashon di pèrmit pa arma (di kandela) den tratamentu. E término pa trata e petishon pa un Deklarashon tokante Kondukta (VOG) ta 5 siman. Na momentu di entrega di e pèrmit pa arma (di kandela), ta entrega e Deklarashon tokante Kondukta (VOG) tambe na e persona ku a hasi petishon.

Kuantu e ta kosta?

Aktualmente no ta kobra leges ora di apliká pa consent òf pèrmit pa arma di kandela.

Ki lei i regla ta konta aki?

Kiko nos ta hasi ku bo datonan personal?

Si bo entregá un petishon òf mèldu algu, Entidat Públiko Boneiru mester di bo dato personal. Entidat Públiko Boneiru ta atendé bo datonan di forma konfidensial.

Den e Lei Protekshon di dato personal BES tin skirbí kon Entidat Públiko Boneiru mester hasi esaki.

E reglanan mas prinsipal ta :

Entidat Públiko Boneiru ta pidi solamente dato ku mester pa por atendé ku bo petishon òf pa atendé ku loke bo a mèldu.
Nan ta registrá i prosesá bo datonan di forma seif, konfidenshal i kouteloso.
Ta usa bo datonan solamente pa e petishon òf loke bo a mèldu, òf pa algu ku tin direktamente di aber ku esei.
No ta warda bo datonan mas largu di loke ta nesesario pa e petishon òf loke bo a mèldu.
Otro organisashon ta haña bo datonan solamente si esei mester segun lei.
Bo por puntra pa kua fin ta usa bo datonan i kiko ta hasi ku nan.