Bo kier haña nashonalidat hulandes? E ora ei bo mester mustra ku bo sa sufisientemente di idioma, bida i trabou na Boneiru i di Reino Hulandes. Bo ta hasi esei via eksámen di naturalisashon.
Promé bo ta tuma kontakto ku IND Karibe Hulandes pa chèk si bo ta bini na remarke pa nashonalidat hulandes.
Kiko e produkto òf servisio aki ta nifiká?
Pa haña nashonalidat hulandes via naturalisashon, bo mester tuma diferente paso. E eksámen di naturalisashon ta ún di nan. Bo por lesa tur informashon den e foyeto ‘Kon bo por haña nashonalidat hulandes’.
Naturalisashon ta nifiká ku bo ta haña nashonalidat hulandes. E ora ei bo ta bira ofisialmente hulandes.
Pa mustra ku bo:
- Ta dominá papiamentu i hulandes sufisientemente;
- Tin sufisiente konosementu di biba i traha na Boneiru;
- Tin sufisiente konosementu di struktura estatal di Reino Hulandes
bo mester pasa eksámen di naturalisashon. E eksámen akí ta obligatorio pa naturalisashon pa haña nashonalidat hulandes, ku eksepshon si bo ta dispensá pa hasi esei.
E eksámen di naturalisashon ta un eksámen ku ta konsistí di tres parti:
- Parti 1: konosementu di komunidat i struktura di estado;
- Parti 2: papiamentu (lesa, skirbi, skucha i papia);
- Parti 3: hulandes (lesa, skirbi, skucha i papia);
Bo mester slag pa tur e partinan akí pa bo por haña Sertifikado di Eksámen di Naturalisashon.
Lesa e foyeto ‘Eksámen di Naturalisashon’ pa informashon mas amplio tokante e partinan di eksámen.
Seremonia di naturalisashon
Haña nashonalidat ta un suseso spesial. P’esei Gabinete di Gezaghèber ta organisá enkuentro spesial kaminda ta duna atenshon na nifikashon di nashonalidat hulandes i bo union ku komunidat hulandes. E seremonia di naturalisashon akí ta pa tur hende ku ta haña nashonalidat hulandes via opshon òf naturalisashon. Bo ta obligá pa bai e seremonia.
Ta na momento ku bo ta presente na seremonia di naturalisashon, i bo hasi deklarashon di union, bo ta haña nashonalidat hulandes. Si bo no por ta presente na e seremonia di naturalisashon, bo ta haña un invitashon nobo pa un siguiente seremonia di naturalisashon. Bo mester presentá denter di un aña despues di e desishon na un seremonia di naturalisashon, despues di hasi deklarashon di union, tuma e anunsio òf konfirmashon di opshon, sino bo no ta haña nashonalidat hulandes.
E ora ei despues di 1 aña bo mester bolbe kuminsá ku prosedura pa naturalisashon òf pa opshon pa por haña nashonalidat hulandes ainda. Ta solamente den kaso masha partikular bo no tin nodi di ta presente. Si bo ta haña ku ta trata di un kaso eksepshonal asina, bo por tuma kontakto ku Gabinete di Gezaghèber.
Kon bo por pidi esaki?
Eksámen di naturalisashon
Gezaghèber ta responsabel pa laga hende pasa eksámen di naturalisashon. Gabinete di Gezaghèber ta sostené den esaki.
Ta organisá e eksámen di naturalisashon dos biaha pa aña. Ta anunsiá e fechanan di eksámen den korant i na radio.
Pa por partisipá, bo ta registrá na Gabinete di Gezaghèber. Bo ta registrá pa henter e eksámen di naturalisashon, òf pa ún òf mas parti di e eksámen:
- Download e formulario
- Mail e formulario kompletamente yená pa: naturalisatie@bonairegov.com
Bo por pasa buska e formulario tambe na Ofisina di Kolegio Ehekutivo.
Gastu
Promé ku bo entregá e formulario, bo mester a paga sèn di eksámen:
Parti 1: konosementu di organisashon di estado i komunidat $154,-
Chèns pa bolbe pasa eksámen parti 1 $78,-
Parti 2: eksámen di papiamentu (tur 4 abilidat di idioma) $126,-
Chèns pa bolbe pasa eksámen parti 2, pa kada parti $42,-
Pa mas ku 3 parti $125,-
Parti 3: eksámen di hulandes (tur 4 abilidat di idioma) $62,-
Chèns pa bolbe pasa eksámen parti 3, pa parti $21,-
pa mas ku 3 parti $62,-
Bo mester depositá e sèn di eksámen riba number di kuenta: 11711808 (MCB Bank Bonaire) menshonando: ‘Sèn di eksámen Naturalisashon’.
Lesa e foyeto ‘Eksámen di Naturalisashon’ pa informashon práktiko di e eksámen konserní.
Seremonia di naturalisashon
Gabinete di Gezaghèber ta organisá e seremonia. Ta invitá bo pa un seremonia di naturalisashon, kaminda bo ta hasi e deklarashon di union, i ta risibí e anunsio òf konfirmashon di opshon.
E seremonia di naturalisashon ta tuma lugá 3 biaha pa aña. Ora ta asina leu, ta informá bo di esaki.
Ku ken bo por tuma kontakto?
Pa registrashon, pregunta òf formulario bo por tuma kontakto ku:
Gabinete di Gezaghèber
Adrès: Kaya Grandi 30
Telefòn: (+599) 715 5330
E-mail: info@bonairegov.com
