Entidat públiko Boneiru a start un kampaña nobo yamá ‘You’ve got the power’. Meta dje kampaña ta pa konsientisá pueblo pa usa ménos koriente i baha gastu. E kampaña ta enfatisá ku kada hende ta kapas pa usa ménos koriente. Pa hopi hende nan kuenta di koriente ta haltu kompará ku nan entrada. I tambe pa hende ku tin un entrada rasonabel, e kuenta di koriente ta sali karu hopi biaha.
Dos aña pasá Direktorado Komunidat i Kuido a kuminsá ku e kampaña ‘No laga koriente dal bo duru’. Dependiendo di e entrada ku un hende tin, e por a apliká pa un kompensashon di 1.300 dòler pa su kuent’i koriente òf Pagabon. Te ainda ta posibel pa apliká pa e kompensashon akí na www.bonairegov.com/koriente Ku ‘You’ve got the power’ e enfoke ta mas riba e loke tur siudadano por hasi pa baha gastu di koriente. Gobièrnu ta yuda esnan ku ta bini na remarka ku e kompensashon pa koriente. Di otro un banda gobièrnu ta pidi un i tur pa usa koriente konsientemente.
Feria di koriente 7 di desèmber 2024
Den e lunanan benidero gobièrnu ta informá kon pa baha gastu di koriente. Komo parti di ‘You’ve got the power’ ta tene djasabra 7 di desèmber 2024 un ‘Feria di Koriente’ na Social Café di 09:00 or di mainta pa 12 or di mèrdia. Na e feria aki, bishitante por haña tep balioso kon pa spar koriente. Tanten ku tin, bishitante dje feria por pasa buska produkto grátis por ehèmpel lus led, òf lus grandi pa protekshon di kas den ora di anochi, òf taimer pa aparato eléktriko. Ta tene tambe un rifa ku premio atraktivo. Por gana un wasmashin inverter ku kapasidat di 13 kilo. Ta rifa tambe un èrko 12000 BTU dòbel inverter, i un eiskast ku ta ekonómiko den uso di koriente.
Na e feria tin chèns pa empresario ku produkto duradero pa kas, por tin un stènt pa duna informashon. Tur empresario òf doño di negoshi ku produkto duradero pa kas, ku ke un stènt na e feria por manda un mail na : koriente@bonairegov.com. Por manda mail te ku 29 di novèmber 2024.
