E ganadó di e akshon di gana premio ‘Boneiru ta bai PSV’ ta konosí. Dentro di poko Micheila Trinidad di Boneiru ta biaha huntu ku su yu muhé Allisha Trinidad pa Hulanda pa un eksperensia úniko rònt di e klup di futbòl PSV i e siudat Eindhoven.
Durante e biahe ku tur kos pagá akí, Micheila i su yu muhé ta sera konosí ku e klup, nan ta bishitá stadion di PSV i djaserka nan ta eksperensiá e ambiente i kultura di Eindhoven i e region di Brainport. E premio ta enserá entre otro pasashi pa dos persona, akomodashon i aktividatnan eksklusivo di PSV. E akshon di gana premio a keda organisá den kolaborashon ku PSV, Entidat Públiko Boneiru i Tourism Corporation Bonaire.
Originalmente e kolaborashon entre Boneiru i PSV a inisiá na aña 2022 i ku e meta pa fortifiká e lasonan sosial, deportivo i ekonómiko entre Boneiru i e region di Brainport Eindhoven. Desde komienso di e kolaborashon, e enfoke ta riba desaroyo di deporte, desaroyo di talento, interkambio di konosementu i konekshon i desaroyo ekonómiko entre ámbos region. PSV ta organisá entre otro aktividatnan di Soccer School na Boneiru, nan ta sostené kapasitashon di treinernan lokal i nan ta kompartí konosementu riba tereno di inovashon i empresariado den e kolaborashon ku Brainport.
Dentro di e kolaborashon tin atenshon spesial tambe pa desaroyo di futbòl femenino na Boneiru. Ku esaki nan no ta enfoká solamente riba desaroyo deportivo, pero tambe riba empoderamentu, salú i partisipashon sosial.
Segun diputado Timoteo Silberie, Entidat Públiko Boneiru ke promové inklusividat, di manera ku tur hende ta haña oportunidat igual den e mundu di futbòl. ‘E oportunidat akí no ta solamente intenshoná pa mucha hòmber. Mucha muhé tambe mester haña posibilidat pa desaroyá nan mes den e deporte akí. Den e kaso akí pa kasualidat ta trata di un ganadó femenino ku ya kaba ta aktivo den e mundu di futbòl. E eksperensia akí lo dun’é un estímulo èkstra pa sigui desaroyá su mes riba e tereno akí,’ segun diputado Silberie.
Ku e akshon di gana premio akí, e partnernan di kolaborashon na un manera spesial ke enbolbí habitantenan di Boneiru mas tantu ainda ku e relashon duradero entre Boneiru i PSV. E biahe di Misheila Trinidad ta suprayá e ambishon konhunto pa sigui fortifiká deporte, edukashon, turismo i konekshonnan kultural.
E akshon di gana premio no a keda organisá solamente na Boneiru, pero e tabata habrí tambe pa partisipantenan for di Hulanda. Ku esaki nan no a krea solamente entusiasmo lokal, pero nan a generá atenshon internashonal tambe pa Boneiru komo destinashon turístiko atraktivo. For di Hulanda tambe nan a selektá un ganadó, ku dentro di poko ta biaha pa Boneiru pa sera konosí ku tur loke nos isla tin di ofresé, entre otro naturalesa, kultura, hospitalidat i hopi aktividat. Ku inisiativanan manera esaki, Boneiru ke sigui promové su mes komo un destinashon úniko di vakansi den e área karibense.
Tourism Corporation Bonaire i Entidat Públiko Boneiru ta ekspresá nan gratitut na Corendon ku ta spònser e pasashinan i nan ta gradisí tambe Grand Windsock Boneiru ku ta spònser e estadia pa e ganadónan for di Hulanda.
