Entidat Públiko Boneiru ta invitá henter pueblo di Boneiru, grandi i chikí, pa selebrá huntu Dia di Boneiru 2026. For di awe, 13 di ougùstùs, inskripshon pa stènt durante Dia di Boneiru ta habrí.
Tur aña Dia di Boneiru tin un tema spesial. E aña akí nos ta marka 40 aña ku Boneiru a haña su propio eskudo ofisial. Promé ku esaki, nos tabata hasi uso di e eskudo di Antia Hulandes. Nos ta pone énfasis riba e hubileo akí komo un fecha importante den nos historia i un di e pasonan pa fortalesé nos propio identidat.
E momento akí ta duna nos oportunidat pa wak bèk riba pasado, pero prinsipalmente pa wak padilanti: kiko nos ke protehá i konservá di Boneiru pa e generashonnan ku ta bin?
Protehá nos isla ta nifiká protehá nos komunidat, nos idioma, nos naturalesa, nos historia i nos identidat komo boneriano. Dia di Boneiru ta un momento pa selebrá tur loke ta hasi Boneiru úniko.
Nos bandera ta un di e símbolonan di nos identidat ku nos ta balorá. Pa drenta den ambiente di Dia di Boneiru, dia 8 di ougùstùs nos a dòrna e rotòndenan ku bandera i dekorashon. Nos ta rekordá komunidat pa respetá e banderanan.
______________________________________________________________________
Informashon tokante inskripshon pa stènt pa Dia di Boneiru
For di 13 di ougùstùs 2026 te ku 28 di ougùstùs 2026 bo por inskribí pa bini na remarke pa un stènt pa bende kos riba Dia di Boneiru.
Kiko bo por bende?
Manera tur aña esnan ku ta deseá esaki por hür un stènt pa bende diferente kos. Esaki por ta:
- Kuminda
- Snèk
- Bibida
- Opheto di arte
- Wega di karta ‘Bon kuné'
- Wega pa mucha
Unda por inskribí i kon?
Bo por inskribí ònlain na www.dia-di-boneiru.com. Promé ku inskribí pa un stènt, ta importante pa lesa e reglanan ku tin riba website. Organisashon i hende ku ta inskribí na Boneiru, ta haña preferensia pa hür stènt. Inskripshon ta sera dia 28 di ougùstùs 2026.
Pago
E preis di hür di stènt ta dependé di loke bo ta bende. Bo por wak e tarifanan pa diferente produkto riba www.dia-di-boneiru.com. Despues di haña aprobashon di bo petishon pa un stènt, bo ta risibí un faktura pa por hasi e pago. Djabièrnè 28 di ougùstùs 2026 ta e último dia pa mustra bo komprobante di pago.
Kanselashon
Den kaso ku kanselá hür di stènt, e hürdó no ta haña e suma pagá bèk.
Nos ta spera di por selebrá Dia di Boneiru en grande ku henter nos komunidat.
