Ku bista riba e dianan di fiesta gobièrnu di Boneiru ta regalá tur mucha di 0-3 aña i tur alumno di skol básiko un bòn pa regalo. E bòn pa regalo ta kuadra ku e plan di gobièrnu pa den futuro introdusí un tarheta pa mucha. Famianan ku un entrada abou i ku den aña 2024 a haña yudansa finansiero di gobièrnu manera ayudo pa paga koriente, paga hür, òf paga material di skol, por haña pa un biaha so un bòn pa supermerkado. E bòn di supermerkado ta intenshoná komo algu èkstra pa nan. Por usa e bòn pa regalo pa mucha i e bòn di supermerkado na algun negoshi.
For di 12 di desèmber 2024 te ku 18 di desèmber 2024 ta entregá e bònnan pa regalo i e bònnan pa kuminda. Por buska e bònnan pa regalo pa mucha di 0-3 aña i e bònnan pa kuminda na Avanti, Cocari i Jong Bonaire. Na skol gerensia di skol ta parti e bònnan pa regalo pa e muchanan di skol básiko.
Fecha i sitio pa buska e bòn pa regalo pa mucha di 0-3 aña i e bòn di supermerkado
12/12/2024 i 17/12/2024: Jong Bonaire di 08:00 – 17:00 or
13/12/2024 i 18/12/2024: Avanti Antriol di 08:00 – 17:00 or
16/12/24 : Cocari, Rincon, di 08:00 – 17:00 or
E dokumentunan ku ta nesesario pa buska e bòn pa regalo pa mucha di 0-3 aña
Pa buska e bòn pa regalo pa mucha di 0-3 aña mester mustra e dokumentunan ku ta menshoná akí bou:
Un sédula bálido òf un pasport bálido
Buki di famia, buki di kasamentu òf un ekstrakto di registro sivil pa prueba ku e mayor òf tutor ta responsabel pa e mucha
Pa buska e bòn di supermerkado
Un sédula bálido òf un pasport bálido
Pa buska e bòn pa regalo pa mucha di 0-3 aña i e bòn di supermerkado e persona ku ta buska e bòn tin ku firma ku el a haña e bòn. Si den luna di desèmber bo no por buska e bòn pa regalo òf e bòn di supermerkado, bo por buska e bònnan for di 8 di yanüari 2025 na Direktorado di Komunidat i Kuido. E adrès ta Kaya Neerlandia 40. Por buska e bònnan for di djaluna te ku djabièrnè di 09:00 or pa 12:00 or.
