For di 4 te ku 10 di desèmber 2024 e di 47 grupo di e kompania di ehérsito (13DELTA), stashoná na Kòrsou, ta organisá un treinen militar na Boneiru. E treinen akí tin komo meta pa familiarisá e unidat ku e bisindarionan na Boneiru i pa fortifiká e kolaborashon ku outoridatnan lokal i servisionan di emergensia.
Riba djaweps 5 di desèmber nan ta organisá un treinen konhunto, kaminda partnernan lokal ta partisipá aktivamente. Banda di esaki e kompania di ehérsito ta komprometé su mes ku proyektonan sosial na Boneiru, manera dunamentu di sosten na inisiativanan lokal.
E unidat ta hasi uso di infrastruktura i tereno di e klup di scouting di Rincon komo sitio pa kampamentu. E ehersisionan ta tuma lugá na sitionan konosí, kaminda ta inkluí eksperensianan anterior pa laga e treinen kana den un forma seif i efektivo.
E siman akí komandante di e unidat, mayor Jan Bethlehem, i e planifikadó sarhento mayor Marc Wesselius tin un sita tambe ku gezaghèber John Soliano. Durante e konsulta akí nan ta deliberá mas aleu tokante e detayenan di e ehersisio i nan ta fortifiká e kolaborashon ku partnernan lokal.
Di antemano nos ta gradisí komunidat boneriano pa nan komprenshon i koperashon durante e treinen akí. Huntu nos ta aspirá pa yega na un kolaborashon eksitoso i un mihó preparashon pa situashonnan den futuro.
