–Pa medio di un karta Kolegio Ehekutivo a supliká sekretario di estado Blokhuis (Salubridat Públiko, Bienestar i Deporte) pa suspenshon di e desishon di Direktorado di Programa Kuido i Hubentut Hulanda Karibense (Programmadirectie Zorg en Jeugd Caribisch Nederland - ZJCN) pa stòp ku e kontrato di kuido ku Bonaire Laboratorium NV (BonLab) na fin di e aña akí. ZJCN ke ubiká e aktividatnan médiko inkluso un parti di personal di BonLab na Fundashon Mariadal. Entidat Públiko Boneiru ta akshonista di BonLab. Despues di a risibí informashon tokante kanselashon di e kontrato di kuido, Kolegio Ehekutivo kuidadosamente a pensa tokante esaki, no solamente den su ròl di akshonista, pero tambe komo protektor di interes di komunidat boneriano. A base di e relato di echo pidí Kolegio Ehekutivo a yega na e konklushon ku ta eksistí opheshon serio kontra e prosedura ku ZJCN a sigui. E desishon ta en pugna ku e punto di bista ku na aña 2018 e Ofisina di Seguro di Kuido (Zorgverzekeringskantoor) a duna di konosé na gerensia di BonLab, pero ta basá tambe riba un rapòrt di kua su ophetividat ta na diskushon. Kolegio Ehekutivo a hasi opheshon tambe kontra e echo ku ta duna BonLab únikamente 9 siman pa tuma medida apropiá, inkluso kumplimentu ku obligashonnan di dunadó di trabou relashoná ku su empleadonan. Alabes Kolegio Ehekutivo ta lamentá e manera di komuniká di parti di ZJCN, loke innesesariamente a krea inkietut serka personal di BonLab i den pueblo. A proponé sekretario di estado Blokhuis pa konhuntamente yega na un solushon ku ta satisfaktorio pa tantu interes di Gobièrnu di Reino komo di komunidat boneriano.
