Entidat Públiko Boneiru un biaha mas ta partisipá na Feria FRED na Rotterdam, e evento di karera ku ta trese profeshonalnan di Hulanda i di e parti karibense di Reino huntu.
E aña akí nos ta bai e feria ku hopi vakatura. E funshonnan akí ta forma parti di nos kampaña mas amplio di reklutashon, ku kua nos ke atraé talento nobo, tantu na Boneiru komo den eksterior. “Traha na Entidat Públiko Boneiru ta nifiká edifiká nos komunidat i huntu duna forma na futuro” segun sekretario insular Christopher Frans.
Ku un variashon amplio di vakatura nos ke amplia nos proseso di reklutashon i selekshon mas aleu. Partisipashon na Feria FRED ta duna nos un chèns pa hasi konekshon ku profeshonalnan den eksterior i krea oportunidat pa yunan di Tera ku ke regresá i kontribuí na desaroyo Boneiru. #AmiTaTrahaPaBoneiru
Sigui nos kanalnan di medionan sosial den e tempu binidero pa mas informashon tokante nos partisipashon na Feria FRED i pa e vakaturanan ku ta disponibel.
