Resientemente a tuma lugá un seshon di trabou inspirativo den kuadro di desaroyo di e Trayekto di Kuido di Demensia. Esaki ta un proyekto ku organisashonnan lokal ta ehekutá i ku a bira posibel pa medio di un supsidio ku ZonMW a pone disponibel spesialmente pa Hulanda Karibense.
Representantenan di kuido i tratamentu, bienestar, gobièrnu, polis i vários organisashon di interes, entre otro Fundashon Alzheimer Boneiru, a bini huntu ku un solo meta komun: laga sosten pa hende ku demensia i nan sernan kerí konektá mas mihó ku otro.
Señora Jacqueline a konta su impreshonante storia personal tokante bida ku su kasá kende tin demensia. Su relato sinsero a konmoví e presentenan i a hasi bon kla kon grandi demensia su impakto ta – no solamente pa e persona mes, pero tambe pa su partner, su famia i e hendenan mas yegá na dje.
Seguidamente e presentenan a ‘brainstorm’ den algun grupo chikitu tokante kon e fasilidatnan eksistente por traha mas mihó ku otro i fortifiká otro. Na diferente mesa a surgi kòmbersashonnan bibitu tokante temanan manera rekonosé señal, aktividat durante dia, sosten di ‘mantelzorg’ i kompartimentu di informashon entre profeshonalnan. E partisipantenan a kompartí nan eksperensianan, puntonan problemátiko i prinsipalmente tambe nan ideanan pa mehorashon.
E ambiente tabata enérgiko i konektivo: ‘konosementu ta kondusí na apresio’ a resultá e lema di e dia. Bon kuido di demensia ta un tarea konhunto. P’esei e lema ta: ‘Sèmper tin un kaminda si nos bai huntu’, loke ta nifiká mas òf ménos: ‘Si nos hasié huntu, sèmper nos lo haña un kaminda’.
Ta inkluí e resultadonan di e seshon akí den desaroyo mas aleu di e Trayekto di Kuido di Demensia – un planifikashon práktiko ku mester sòru pa un kolaborashon sin ningun problema i sosten rekonosibel pa hende ku demensia i nan sernan kerí, for di e promé señalnan te den e fasenan mas lat di e proseso di e malesa.
‘Awe un biaha mas nos a mira kuantu enbolbimentu i konosementu tin na nos isla,’ segun lider di proyekto Sigiona Provence di Fundashon Mariadal. ‘Pa medio di traha huntu, berdaderamente nos por hasi e diferensia pa hende ku demensia i nan sernan kerí.’
Ku e seshon di trabou akí a pone un paso importante den direkshon di un isla ku ta tene kuenta ku demensia i kaminda tur hende ta konta, i tambe kaminda kuido, bienestar i komunidat sa kon pa haña otro. Den kada fase di e proyekto lo organisá un seshon manera esaki, pa informá tur hende i pa buska informashon.
Si bo ke sa mas tokante e proyekto akí, bo por manda un email pa sra Daniëlle van der Linden, kende ta traha na Entidat Públiko Boneiru: danielle.vanderlinden@bonairegov.com
