Riba djárason 5 di novèmber Entidat Públiko Boneiru a kuminsá ku trabou di restorashon den bisindario di Mentor. Den e fase akí ta koba i limpia un parti di e roinan ku ta bai Saliña di Vlijt, parti pariba di Kaya Korona. Entidat Públiko Boneiru su aspirashon ta pa kaba mas rápido posibel ku e trabou akí, kaminda áwaseru por kousa retraso den progreso di e trabou.
E trabou akí ta forma parti di e proyekto di Restorashon di Saliña di Vlijt, ku ta enfoká riba restorashon duradero di e sistema natural di maneho di awa i riba fortifikashon di e funshonnan ekológiko den e área. Un saliña ta un área natural di almasenahe di awa ku ta yena ku awa di laman i awa di yobida.
For di aña 2019 no a ehekutá niun mantenshon mas den Saliña di Vlijt, di manera ku e área a sigui yena ku sedimentu. Pa evitá ku e sedimentu akí ta kore bai laman i kousa daño na nos ref di koral i na biodiversidat, ta koba i saka un parti di e sedimentu, entre otro den e roinan bieu den bisindario di Mentor. Di e manera akí e saliña por akumulá sedimentu atrobe i e kapasidat pa almasenahe di awa ta oumentá.
Ku e proyekto akí Entidat Públiko Boneiru ke restorá naturalesa den e área i krea espasio pa rekreashon i edukashon. E saliñanan ta áreanan importante di biba pa para di awa i sitionan kaminda paranan migratorio por sosegá entre Nortamérika i Suramérika. Banda di esaki un saliña ta kontribuí na kalidat di ref, pa motibu ku e ta fungi komo kamber di parto pa diferente piská i otro tipo di bida bou di laman.
E trabou di kobamentu parti pariba di Kaya Korona (Mentor) ta forma e promé fase di e proyekto di Restorashon di Saliña di Vlijt. Den un fase mas lat lo atendé ku e otro partinan tambe di e saliña.
Ta transportá e sedimentu ku bini liber pa e sitio di depositá shushi di Selibon, kaminda ta bai us’é komo material pa tapa restu di shushi.
