Kralendijk – EPB tin komo un di su prioridatnan pa sigui desaroyá e sektor di agrikultura. E kunukeronan lokal tin mester di un bon produkshon di awa pa nan vegetashon i bestianan. Pa diputado James Kroon ta importante pa L.V.V. mantené e diferente posnan públiko i mulina. Esaki ta hopi importante pa desaroyo di agrikultura. Un par di e posnan ta eksigí mantenshon grandi. E posnan mester haña un limpiesa di paden i mester koba nan mas tantu. Aña pasá diputado Kroon a pone sèn disponibel pa e pos Barra di Karta. Awor e pos di Rincon (Gruta di Lourdes) ta na turno.
E kompania Elite Quality a kuminsa djabièrnè pasá ku e trabou na e pos aki i e ta spera ku e trabou ta kla den algun dia. Diputado Kroon ta spera ku e kunukeronan di Rincon ta stimulá pa subi nan produkshon. Diputado Kroon ta yama danki na L.V.V. pa nan esfuerso.
