Bida di kada un di nos ta un trayekto konstante di deskubrimentu i toma di desishon. Kada dia di nobo ta habri un página blanku ku ningun di nos no sa kon e dia lo transkurí. Awe, riba dia di Boneiru mi kier enfatisá riba bida i tambe riba prinsipionan ku ta determiná kalidat di bida. Mi promé konseho ta pa nos biba ku pashon, no laga ningun persona òf instansia deshasí di bo metanan i trata na kita bo felisidat. Ta kada un di nos ta para òf sinta tras di e stürwil di nos propio bida.
For di e promé sekònde ku un ser humano mira lus di bida un lus a sende. Ta na mayornan primeramente i despues famia, bario, maestronan, lidernan i al final nos mes pa pèrkurá pa e lus sigui bria i keda sendé-sendé.
Mayornan tin un ròl hopi importante pa eduká, forma i krea siudadanonan ehemplar i sòru pa e lus den kada hóben floresé.
Famia ta e núkleo mas importante den kualkier sosiedat.
Bario tin e tarea pa yuda eduká i krea un ambiente sano kaminda e hóben por desaroyá su talentonan optimalmente.
Skol i edukadornan ta indispensabel den desaroyo di nos futuro prospektonan i mester realisá ku mester sigui fortifiká edukashon di kas i saka lo máksimo for di kada kriatura.
Lidernan mester ta ehemplar i hasi nan máksimo esfuerso pa kada gremio, sektor i grupo den komunidat haña e atenshon nesesario.
Grandinan sa uza e proverbio ” vruminga bou di saku di suku no ta muri”. E proverbio aki ta bisa hopi i por ser interpretá den diferente forma.
- Mayornan ku duna nan yunan amor, atenshon, bon edukashon ta ser konsiderá dor di nan propio yunan despues komo Rei i Reina.
- Famianan ku ta sostené otro i korigí otro ta fomentá felisidat i krea un pueblo ku prinsipionan haltu.
- Barionan limpi, bunita i bon organisá ta laga nos isla lusi.
- Maestronan di skol ku amor i dedikashon pa nan profeshon lo ser apresiá i respetá dor di komunidat pa semper.
- Lidernan berdadero lo ser konsiderá héroe ora esnan ménos privilegiá den komunidat ta disfrutá di un bida konfortabel.
Boneiru, mi isla stima, tin hopi pa ofresé na su pueblo i bishitantenan. E baranka aki tin un kultura i historia riku kaminda ta reina trankilidat, pas i hermandat. Esaki nan mester fungi komo e fundeshi pa futuro desaroyo.
Lamentablemente awe mester a eliminá e parti festivo/ kultural pa motibu di COVID i nos kier kòrda un i tur pa sigui protehá bo mes kontra e enemigu invisibel ku yama COVID-19.
Banda di COVID tambe nos tin algun otro reto nos dilanti ku tur pais den desaroyo ta pasa aden i awe mi kier menshoná algun:
- Nos mester kambia di un mentalidat di dependensia pa un mentalidat di responsabilidat propio. Si esaki enbèrdat tuma lugá nos lo haña libertat mental ku na su turno lo hasi nos hopi mas kreativo i produktivo.
- Nos mester stòp di gasta tempu i energia na kosnan ku nos no por kambia òf influensia i dediká tur nos potensial i rekursonan na progreso i adelanto. Esaki pa e simpel echo ku nos rekursonan humano ta limitá. Ta ku trabou inkansabel di un i tur i un vishon bon deliniá por logra metanan muchu mas aya.
- Reklamo sin base no ta kita e preokupashon di awe i lo krea estorbo den nos pensamentu pa yega na un solushon kreativo pa nos retonan.
- Tin ora nos tin demasiado ambishon ku ta trese intrankilidat polítiko i sosial. Semper lo bai tin serunan haltu ku nos NO por subi i mester reserva energia, fondo i kapasidat pa yega mas leu ku ta posibel.
Pa surpasá e desafionan ku mi a kaba di menshoná mester uni forsa, buta e ser humano sentral i kombatí nos enemigu mas grandi, ku ta miedu. Na hopi okashon mi ta tende ku nos mes no por. E aspekto di debilidat aki definitivamente mester pasa pa olvido.
Grandi ta, i respetá nos lo bira ora nos kultura di trabou den gobièrnu i sektor priva, pero tambe den famia mester ta basa riba prinsipionan di rèspèt, komprenshon i aseptashon i apresio pa bo mes, bo alrededor i otronan.
Kada desaroyo maske kon chikí e por ta mester tin un karakter duradero, apesar ku nos rekursonan finansiero i humano ta limitá. No mag di tin desperdisio di tempu, ni plaka. Laga ora nos ta defendé interes di nos patria, laga nos hasi esaki kolektivamente i ku hopi orguyo. Awe riba e dia tan speshal aki mi kier hasi un petishon na henter pueblo pa den futuro riba dia di Boneiru pa e bandera di Boneiru ta waya na kada kas i edifisio.
Komo isla chikitu semper bai nos mester keda ALERTA. Eksperensia di bida a siña nos ku no ta tur palabra ta kos di papia i no ta tur pregunta tin kontesta.
Pero bida a siña nos tambe ku huntu nos ta yega mas leu i ku apoyo i sosten di un i tur nos ta logra metanan mas aya.
Un felis dia di Boneiru i laga nos sigui disfrutá di bida i hiba Boneiru kada dia mas dilanti. Kòrda ku sali na vanguardia di nos isla ta un responsabilidat di nos tur. BIBA NOS BONEIRU.
