E proyekto pa hóben The Next Wave na Jong Bonaire a terminá eksitosamente. Den e periodo di 7 di mart te ku 23 di aprel, vários hóben a partisipá aktivamente na e proyekto akí, kaminda salú, kuminda i empresariado tabata sentral. E proyekto no a sòru solamente pa e hóbennan haña konosementu, pero el a stimulá nan tambe pa hasi eskoho mas saludabel den nan bida diario i den bida di otronan.
GGD Bonaire / Salubridat Públiko di Entidat Públiko Boneiru a ehekutá e proyekto den kolaborashon ku Jong Bonaire i Scholengemeenschap Bonaire (SGB). Pa medio di e kolaborashon amplio akí e abilidatnan ku e hóbennan a siña, ta keda útil den práktika.
Durante The Next Wave, empleadonan di kushina di Jong Bonaire i SGB a sigui algun tayer di kushinamentu. Durante e tayernan akí nan a siña prepará diferente reseta saludabel i sabroso pa gruponan grandi. Banda di esaki e hóbennan di Jong Bonaire a haña tantu lès di teoria komo lès di práktika. Nan a siña entre otro tokante kome konsientemente, lesa etiketa i influensia di kuminda riba nan salú físiko i mental. Tambe nan mes a prepará pasaboka i kuminda saludabel. Ademas nan a traha video i un kantika pa por pasa e mensahe di un estilo di bida salú na un manera eksitoso pa otro hende na Boneiru. Finalmente e hóbennan tur siman a haña un lùnch saludabel for di nan propio kòki, ku a sigui e tayernan di kushinamentu.
E partisipantenan a reakshoná visibelmente entusiasmá riba e proyekto. Tokante e parti di Show Up, kaminda e hóbennan a traha huntu riba un tarea relashoná ku promoshon di un estilo di bida salú (aktua komo embahador di salú), un di nan a konta: “Loke ami a gusta mas tantu ta ku komo grupo di mucha muhé nos a traha bon huntu. Huntu nos a siña i logra algu bunita.”
Pa e motibu akí ku satisfakshon GGD Bonaire / Salubridat Públiko ta wak bèk riba e proyekto i ta mira The Next Wave komo un paso importante den prevenshon i edukashon di kuminda serka hóbennan. E kolaborashon ku otro partnernan i e enbolbimentu di nos hóbennan ta forma un base fuerte pa posibel inisiativanan di kontinuashon.
Ku proyektonan manera The Next Wave, Boneiru ta sigui invertí den un generashon ku ta enfrentá futuro na un manera konsiente i salú.
