Dia 25 di ougùstùs e organisashon di konosementu i ret DutchCulture ta organisá un tayer grátis tokante Creative Europe, e programa di Union Oropeo pa sektor kultural, kreativo i oudiovisual. Kreadornan i institutonan kultural na Boneiru ku ta interesá den kolaborashon kultural internashonal ta haña informashon tokante kon DutchCulture por ofresé sosten. E tayer ta tuma lugá na Captain Don’s Habitat for di 19:00 or te 21:00 or.
Ta bai trata diferente pregunta, manera: kiko ta e programa di Creative Europe i pa ken esaki ta? Kua ta e areglonan di supsidio oropeo ku ta optenibel? Kiko ta DutchCulture i kon e organisashon akí por yuda mi pa hasi mi ret internashonal mas grandi? Gezaghèber interino Nolly Oleana i diputado Nina den Heyer tambe lo hasi akto di presensia. Na final lo tin un momentu informal di trabou di ret (networking).
Programa di sosten di 7 aña
Creative Europe ta e programa di sosten di 7 aña di Komishon Oropeo pa sektor kultural i oudiovisual. E ta konsistí di dos sup-programa: Kultura i Medionan di Komunikashon. Banda di esei tin un areglo disponibel pa proyektonan ‘cross’-sektoral, esta proyektonan ku ta konektá sektornan ku otro i mustra e forsa di kada sektor, i kon e forsa di un sektor por ta forsa di un otro sektor tambe. Creative Europe Desk NL ta e punto di konseho i informashon pa Creative Europe den Reino Hulandes i ta duna konseho na e sektor kultural, kreativo i oudiovisual tokante tantu e posibilidatnan ku e programa ta ofresé pa drenta den kolaborashon oropeo, komo tokante skirbimentu di un petishon.
Creative Europe Desk NL ta forma parti di DutchCulture, e organisashon di konosementu i ret pa Reino Hulandes riba tereno di kolaborashon kultural internashonal. E organisashon ta duna sosten na e sektor kultural i kreativo, gobièrnunan i ofisinanan diplomátiko pa loke ta trata realisashon di nan ambishonnan internashonal. E organisashon ta hasi esaki pa medio di duna informashon, konseho i treinen. Banda di esaki DutchCulture ta konektá profeshonalnan kreativo, organisashonnan, gobièrnunan i retnan ku otro den kuadro di kolaborashon internashonal.
Ta organisá e tayer den koperashon ku Rijksdienst Caribisch Nederland i e Internationale Desk Bonaire. Pa mas informashon por tuma kontakto ku Jelle Burggraaff, hefe di Mobiliteit & Advies/Creative Europe Desk NL, via j.burggraaff@dutchculture.nl i e konsehero di Creative Europe Desk NL Albert Meijer, via a.meijer@creativeeuropedesk.nl
