E tayer ku International Desk Bonaire di entidat públiko Boneiru a organisá a hala hopi organisashon ku tabata interesá den mas informashon tokante kon pa yega na fondonan di Union Oropeo.
Na yegada di e partisipantenan nan a haña un kaluroso bon biní di parti di e tim di International Desk, ku tabatin refuerso di e ‘Trainee di Reino’ di e Representashon Diplomátiko Spesial di RCN. E tayer a kuminsá ku un introdukshon kòrtiku di Esther Broeksema, kordinadó di proyekto di International Desk. Despues Felix Braeckman, skirbidó di proyekto di International Desk, a kuminsá ku su presentashon tokante e fondonan di Union Oropeo. E presentenan a haña informashon tokante e fondonan di Union Oropeo ku ta disponibel pa Boneiru, e proseso di entrega di un proposishon i fondonan di Union Oropeo ku organisashonnan boneriano por hasi uso di dje.
Durante e tayer a bira evidente kon importante un laso di kolaborashon entre organisashonnan ta pa un isla chikitu manera Boneiru. Pa medio di traha huntu, organisashonnan na Boneiru ta hasi nan chèns mas grandi na momentu di entrega di un proposishon. Na final di e tayer den forma espontáneo e partisipantenan tabata hasi trabou di ret pa pone sierto pasonan den direkshon di un posibel laso di kolaborashon.
Tokante International Desk Bonaire (IDB)
Tin vários programa di Union Oropeo i programa di Nashonnan Uní ku ta ofresé hopi oportunidat pa Boneiru riba tereno di desaroyo di konosementu i sosten finansiero, tantu pa entidat públiko Boneiru komo pa interesadonan den komunidat boneriano. Pa e motibu akí entrante 1 di yüli 2022 a bini ku un ofisina internashonal pa Boneiru, ku komo meta pa kompartí informashon tokante fondonan oropeo i otro fondonan internashonal ku ta disponibel pa Boneiru. Pa motibu di e interes grandi den e tempu binidero lo organisá mas tayer.
