Miembronan di e Taskforce di Reino pa Derecho di Mucha a traha vários plan nobo pa edukashon di mucha, prevenshon di abuso di mucha, partisipashon di hóbennan na temanan ku ta konserní nan. E Taskforce a skohe pa esaki durante un konferensia di trabou ku a tuma lugá di 13 pa 16 di mei na Boneiru. Miembronan di Taskforce di e paisnan i entidatnan públiko den Reino, i representantenan di ministerionan hulandes tabata presente na e konferensia. A tene e konferensia pa para ketu na e resultadonan ku e Taskforce a logra durante su 10 aña di eksistensia i pa traha plan pa futuro.
Den e Taskforce di Reino pa Derecho di Mucha tin eksperto riba tereno di hubentut i famia di e seis islanan. Den e Taskforce tin tambe representantenan di ministerio di Asuntunan Interno i Relashonnan den Reino i ministerio di Salubridat Públiko, Bienestar i Deporte.
Nan a lanta e Taskforce di Reino pa Derecho di Mucha na aña 2014 na e Konferensia di Reino na Aruba. Durante e konferensia akí e miembronan a hasi palabrashon ku den reino kada mucha tin derecho riba un hubentut felis. E miembronan ta sigui e artíkulonan ku tin den e Tratado Internashonal enkuanto Derecho di Mucha.
E intenshon ta pa introdusí algun programa serka mayornan pa duna nan sosten ku edukashon di nan yunan. E plan ta tambe pa bini ku fuentenan digital di informashon i instrukshon pa profeshonalnan ku tin di haber ku edukashon di mucha. Pa prevení abuso di mucha, a krea liña di telefòn di ayudo pa mucha i hóben i a kapasitá profeshonalnan den rekonosementu di señal di tur forma di maltrato di mucha. Tambe ta stimulá partisipashon di mucha i hóben na tur e islanan. Den práktika pa kada isla e plannan por ta otro.
Durante e konferensia a bini dilanti ku e Taskforce ta èkstra balioso pa e islanan. Tur e islanan a logra resultadonan konkreto den e 10 añanan tras di lomba, danki na kolaborashon den e Taskforce. Un kolaborashon mas estrecho ta nesesario pa protehá bienestar di mucha i hóben den reino mas tantu ainda.
Na aña 2025 e Taskforce ta organisá e siguiente konferensia na Aruba. Na e konferensia akí e punto di lansa òf tópiko ‘mucha vulnerabel’ lo ta sentral. Dependiente di e islanan esaki ta bai por ehèmpel tokante derecho di mucha ku no ta disponé di e dokumentashon nesesario pa por biba na un isla. E ta bai tambe tokante derecho di mucha ku un limitashon i tokante mucha ku ta den detenshon huntu ku hende adulto.
E miembronan ta wak bèk riba un enkuentro eksitoso na Boneiru i nan lo sigui hasi esfuerso pa salbaguardiá derecho di mucha den reino.
