Willemstad ̶ E Taskforce di Reino pa Derechi di Mucha a lansa su propio wèpsait dia 1 di yüni 2021. A lanta e Taskforce aki na 2014 ku e meta pa stimulá kooperashon den Reino, riba tereno di derechi di mucha. Kompartí konosementu, krea konekshon i kooperashon entre paisnan ta e ophetivo prinsipal.
E paisnan miembro di e Taskforce ta: Aruba, Kòrsou, St. Maarten i Hulanda, ademas di e entidatnan públiko di Boneiru, St. Eustatius i Saba.
E wèpsait ku a kaba di lansa ta fungi komo plataforma ku informashon aktual tokante derechi di mucha na e seis islanan i ta destiná pa kompartí konosementu i stimulá kooperashon entre tur miembro di Taskforce i otro gruponan di interes.
E wèpsait ta kontené prinsipalmente informashon dirigí na profeshonalnan ku ta traha pa i ku mucha i hóben den tur área di trabou, for di edukashon te ku hustisia.
Pa wak e sait i pa informashon adishonal por bai na www.tfkinderrechten.info pa e vershon na hulandes i www.tfchildrights.info pa e vershon na ingles. Alabes Taskforce ta solisitá tur profeshonal den Reino ku ta traha pa i/òf ku mucha i hóben pa registrá via e wèpsait pa risibí e boletin di informashon ku lo sali tur kuartal. Si ta trata di un profeshonal ku a yega di asistí na un di e konferensianan di Taskforce den pasado, e persona aki lo risibí e boletin di informashon outomátikamente.
Pa mas informashon, por tuma kontakto ku e representante di Taskforce na Boneiru, Reginald de Palm: reginald.depalm@bonairegov.com.
