Ta desaroyá Playa Fòrn’í Kalki pa famianan lokal por gosa mas den e mesun ambiente

Gobièrnu di Boneiru ta sigurá ku Playa Fòrn’i Kalki ( Bachelor’s Beach) lo keda aksesibel ku entrada gratis pa tur bishitante.  A skohe pa desaroyá e bich pa drecha e fasilidatnan  pa famianan por gosa mas di e playa manteniendo e ambiente aktual.

Durante último lunanan gobièrnu a risibí diferente remarke i sugerensia riba diseño di e playa. A base di esakinan a revisá  e diseño i añadí mas fasilidat pa tur ku ke bishitá e bich.  A agregá mas lugá pa stashoná outo i lugá pa skuter i/òf baiskel.
Un parti importante tambe ta seguridat di tur bishitante i sobrá personanan den bisendario di e bich. Pa esaki lo bai sòru pa pone drèmpel riba E.E.G Boulevard pa asina outomobilistanan por tene kuenta ku  velosidat.

Ta bai krea un terasa ku tur hende  por hasi uzo di dje i tambe un zona kaminda personanan por bbq. Hendenan ku ta bishitá e bich por trese nan mes refresko i kos di kome.  Pa nos muchanan lo bai tin un area di hunga. Lo tin fasilidat di baño pa un i tur ku ta bishitá e bich. E otro fasilidatnan ta kiosko kaminda empresarionan lokal por bende produkto i/òf  hür ekipo. E posibilidat pa entregá petishon pa kiosko ta keda anunsiá pronto.

Gobièrnu di Boneiru ta desaroyá e proyekto akí huntu ku su partnernan. E partnernan envolví den desaroyo di Playa Fòrn’í Kalki ta Tourism Corporation Bonaire (TCB) i TELBO. TCB ta responsabel pa  maneho di e bich i TELBO lo sòru pa un konekshon di internèt gratis i rápido pa asina tur bishitante di e bich por keda konektá.

Gobièrnu di Boneiru a tuma konseho di diferente instansia ku ta atendé ku fasilidat pa personanan desabilitá, naturalesa i turtuga. Ta bai desaroyá e bich a base di uso aktual.  Aktualmente ta hasi uzo di e bich den forma kaminda famianan ta bini huntu i forma nan propio ambiente. E estado aktual no ta agradabel ora awaseru kai i a skohe pa desaroye pa tur hende por hasi uso di e bich na un manera sano. Gobiernu di Boneiru su meta ta pa e bich keda ku su  identidat aktual i no bira muchu drùk tampoko. Di e forma akí gobièrnu ta kumpli ku desaroyo manteniendo e kultura i naturalesa intakto.