Kralendijk – Awor ku e kantidat di kasonan di COVID-19 ta sigui baha, por adaptá medidanan. Asina gezaghèber Edison Rijna a anunsiá. E medidanan nobo ta konta di djabièrnè 5 di febrüari 2021 te ku djaweps 18 di febrüari 2021. Establesimentunan di horeca por sera entrante djabièrnè awor 12 or di anochi. Kasino por keda habrí te 2 or di mardugá, nan parti di horeca ta sera 12 or di anochi. E reglanan di un máksimo di 50% di kapasidat i lugá fiho di sinta ta keda na vigor.
Pa motibu di e kantidat abou stabil di infekshon na Kòrsou, ta suavisá e kondishonnan un tiki pa biaha di e isla ei pa Boneiru. Pasaheronan for di Boneiru ku ta bai Kòrsou pa durashon kòrtiku i ta keda ei maksimalmentu ún anochi, no mester hasi tèst di PCR mas na regreso. Esaki ta konta tambe pa biaheronan ku ta bin Boneiru for di Kòrsou pa maksimalmente 1 anochi.
Nan no mester mustra resultado di PCR na yegada. Sí nan mester yena e deklarashon di salú di e departamento di Salubridat Públiko ainda. Tur biahero ku ke hasi uso di e areglo akí na yegada na Boneiru mester mustra un pasashi di ida i buelta di mesun dia òf e dia siguiente. de volgende dag.
Na eventonan organisá profeshonalmente, por usa 50% di kapasidat ku un máksimo di 50 partisipante. Bishitantenan mester registrá nan mes, no ta permití pa kanta òf balia. Hendenan ku un profeshon di kontakto, mester bisti un tapaboka durante nan trabou. Den misa baidónan di misa por kanta moderá sin alsa bos, bentananan di misa mester ta habrí sí.
Den práktika ta resultá ku sitio di trabou ta un di e lugánan ku mas riesgo pa hende infektá ku e vírùs. P’esei ta konsehá ainda pa traha na kas òf organisá e espasio di trabou di un manera ku trahadó por traha na un distansia seif di otro.
Ora ta hasi deporte den sala, por usa 50% di kapasidat, no ta permití públiko. Presentenan mester registrá nan mes, hasi un chekeo di salú i na final bai kas mesora. Ta permití aktividat di deporte den aire liber, i por usa 100% di kapasidat durante esei. Kondishon ta ku adultonan mester tene 1,5 meter di distansia for di otro. Por lo demas ta konta pa hasimentu di deporte den aire liber mes regla ku hasimentu di deporte den sala. Por tene kompetensia atrobe, pero ainda sin públiko.
Den e fase akí tambe ta keda hopi importante pa den kaso di keho pa laga tèst bo mes mesora. Protehá bo mes i otronan rònt di bo. Pa un bista kompleto di e medidanan: www.bonairecrisis.com
