Supsidio i kompensashon pa preparashon pa doñonan di bibienda monumental

Doñonan partikular di un monumento ku un funshon di bibienda na Boneiru, for di 1 te ku 30 di sèptèmber 2026 por pidi supsidio pa mantenshon i reparashon di nan monumento. E areglo di supsidio pa mantenshon i reparashon di bibiendanan monumental ta un areglo piloto pa Boneiru, Sint Eustatius i Saba. Pa esaki tin un montante total di USD 1,1 mion disponibel. Den e areglo tin un montante total di USD 550.000 reservá pa Boneiru. Pa kada monumento por pidi un montante di supsidio di minimalmente USD 25.000 i maksimalmente USD 100.000.

Doñonan di edifisionan históriko ku no a designá ofisialmente komo monumento, tambe por bin na remarke pa e areglo. Esaki ta konta pa tantu edifisionan den áreanan históriko protehá di Kralendijk i Rincon komo bibiendanan históriko situá pafó di e áreanan ei. Komo eksigensia, e edifisionan akí mester tin mas ku 50 aña. Tambe nan mester ta importante pa Boneiru pa nan historia, kultura òf estilo di konstrukshon bunita. Adishonalmente ta rekerí un deklarashon por eskrito di Kolegio Ehekutivo pa e edifisionan akí. E konseheronan di konstrukshon (personanan di kontakto pa e supsidio pa monumentonan residensial) ta tuma kontakto ku Entidat Públiko Boneiru pa sigui ku e prosedura.

Rijksdienst voor het Cultureel Erfgoed, RCE, ta trata e petishonnan di supsidio.

Kompensashon pa gastunan di preparashon

E preparashon pa e petishon di supsidio pa bibiendanan monumental ta tuma tempu. P’esei doñonan por kuminsá prepará nan petishon for di awor. Ta posibel pa optené un parti di e gastunan di preparashon akí via Nationaal Restauratiefonds. Pa un petishon di supsidio mester di entre otro un inspekshon aktual di konstrukshon, un deskripshon di trabou i un bista di e gastunan di mantenshon i reparashon.

E kompensashon ta maksimalmente USD 5.000 pa monumento. Ta paga e montante akí direktamente na e konsehero di konstrukshon i dedusí esaki for di e gastunan di preparashon ku mester paga e doño. Pa e kompensashon akí tin un total di USD 52.000 disponibel. Ta duna e kompensashon akí tanten ku tin fondo disponibel.

Promé ku yena dokumentonan, e konsehero di konstrukshon ta hasi un evaluashon global di e probabilidat ku ta aseptá un petishon di supsidio. Den e evaluashon akí ta tene kuenta ku entre otro estado di e monumento, e trabounan nesesario i faktibilidat di e petishon. Asina ta evitá mas tantu posibel gastunan innesasario pa e doño.

Si un doño no por paga e gastunan di preparashon delantá, Fondo di Restourashon por paga maksimalmente USD 2.500 direktamente na e konsehero di konstrukshon. Por paga e montante ku falta despues a base di faktura i pruebanan di pago.

No kuminsá ainda ku e trabounan

No kuminsá ainda ku e trabounan di mantenshon òf reparashon promé ku a tuma un desishon tokante e petishon di supsidio. Trabounan ku a kuminsá kaba òf finalisá, promé ku a tuma un desishon tokante e petishon di supsidio, no ta bin na remarke pa supsidio.

Pa mas tardá fin di febrüari 2027, RCE ta tuma un desishon tokante e petishonnan. Despues ku konsedé e supsidio, e doño tin dos aña di tempu pa hasi e trabounan.

Pa e promé evaluashon i guia, doñonan por tuma kontakto ku un di e siguiente konseheronan di konstrukshon:

• Gino Obersi – info@ginoarchitecture.com – +599 9 777 1513
• Norman Panneflek – npanneflek@gmail.com – +599 9 511 8207
• Isabella van den Bussche – isabella@stichtingcocari.org – +599 786 9339
• Michael Newton – michael@newton.cw – +599 9 510 6978

Solamente por pidi e supsidio di 1 te ku 30 di sèptèmber 2026. Mas informashon tokante kondishonnan, dokumentonan nesesario i prosedura di petishon, por haña na:

https://www.cultureelerfgoed.nl/onderwerpen/s/subsidieregeling-monumenten-caribisch-nederland

Pa kualke pregunta tokante e areglo, por tuma kontakto ku e siguiente personanan di Entidat Públiko Boneiru:

- Margyëne Booi – margyene.booi@bonairegov.com (Konsehero di Maneho Konstrukshon & Patrimonio)

- Daudi Cijntje – daudi.cijntje@bonairegov.com (Mènedjer di programa Kultura & Patrimonio)