Studiantenan di e di dos aña di e formashon di ‘Dienstverlening’ di MBO, resientemente a tene un enkuesta tokante siguridat den tráfiko na Boneiru. Nan a presentá resultado di e investigashon akí na diputado Anjelica Cicilia ku ta responsabel pa Mobilidat i Infrastruktura.
Mas ku 3000 partisipante a duna nan opinion tokante tráfiko
Mas ku 3000 habitante di Boneiru a yena e enkuesta. Ku esaki e investigashon ta ofresé un imágen amplio i representativo di situashon di tráfiko na nos isla. E studiantenan entre otro a hasi pregunta tokante kua medio di transporte nos poblashon ta usa mas tantu i tokante estado di e kamindanan na Boneiru.
Apresio
Diputado Cicilia a ekspresá su apresio pa e inisiativa i pa e esfuerso ku e studiantenan a hasi. “Ta alentador pa mira ku nos hóbennan ta okupá nan mes aktivamente ku temanan sosial manera siguridat di tráfiko. Sigur nos lo inkluí e sifranan akí den desaroyo di futuro vishonnan di mobilidat i na momentu di duna forma na transporte públiko na Boneiru.”
Huntu nos ta sòru pa siguridat riba kaminda
Entidat Públiko Boneiru ta hasi un yamada riba tur usuario di kaminda pa keda alerta i partisipá na un manera responsabel na tráfiko. Sea kouteloso riba kaminda – no solamente pa bo mes, pero tambe pa e otro usuarionan di kaminda. Solamente huntu nos por sòru pa un tráfiko sigur na Boneiru.
