Djabièrnè anochi 20 di yüni 2025, a tuma lugá na Plaza Resort Bonaire e edishon festivo di Streanan Deportivo – e evento kaminda INDEBON, den kooperashon ku Fundashon Wega di Number Boneiru (FWNB) i Entidat Públiko Boneiru, a duna homenahe na tur atleta i coach ku a sobresalí den e aña deportivo ku a pasa. Tabata un nochi inspirativo yen di orguyo, apresio i solidaridat.
Durante e nochi di gala spesial akí, a rindi homenahe na tantu atletanan djuniòr komo seniòr, i tambe nan coachnan, pa nan perseveransia, disiplina i prestashon tantu na nivel lokal komo internashonal. Ku Streanan Deportivo Boneiru ke krea un tradishon duradero den kua anualmente ta rekonosé ampliamente esfuerso i éksito di deportistanan.
INDEBON, FWNB i Entidat Públiko ta ekspresá nan gradisimentu grandi na tur atleta, coach i organisashon di deporte —tambe na esnan ku físikamente no por tabata presente. Nan dedikashon i perseveransia ta forma e forsa tras di kresementu di deporte na Boneiru.
Ku bista riba futuro, e organisashon ta spera di realisá den e siguiente edishonnan un oferta di deporte mas amplio i diverso. Asina nos ta spera ku Streanan Deportivo ta krese bira é momentu anual den kua tur deporte, atleta i coach ta bini huntu pa selebrá prestashon i inspirá otro.
Na nòmber di organisashon, nos ta gradisí tur hende ku a kontribuí na éksito di Streanan Deportivo 2025. Huntu rumbo pa un Boneiru deportivo!
