Spich Gezaghèber brindis di aña nobo

Esei ta un palabra ku nos ta usa hopi na kambio di aña. Pa mi for di promé di ougùstùs 2024 un bida nobo a kuminsá, kaminda mi a asumí e kargo i responsabilidat di gezaghebber. 5 luna ku a trese  kantidat di momentunan di desishon I aktuashon rápido i deligente di mi komo gezaghebber. Mi ta gradisí boso tur un biaha más pa e sosten i kaminda ta nesesario krítika konstruktivo ku mi a risibí. Esaki tabata un empuhe pa mi kresementu den e funshon aki. Danki di kurason pa esaki!

Den e periodo kòrtiku aki tin algun kos ku a resaltá i ta nesesario pa para ketu na esaki.

Boneiru a desaroyá positivamente den e último añanan ku a pasa. Nos tin un porsentahe hopi abou di personanan sin trabou i  un grado di partisipashon haltu den e sektor laboral. Pues nos ta un pueblo trahadó!

Tur desaroyo ta trese retonan ku né. Nos no por desaroyá kedando ku tur kos manera nan tabata antes. Ta parse hopi biaha ku antes tur kos tabata mihó pero esei no nesesariamente ta berdat. Mi suegro di 85 aña a konta mi ku e la lanta komo mucha tende kos ta malu na Boneiru i e tabata puntra su mes ta ki dia kos ta drecha?

Desaroyo ekonómiko mes ta bai man den man ku desaroyo di e hende. Pa esaki tambe tin hopi esfuerso a i ta ser hasí pa duna un kontribushon na esaki. Sosten I preparashon pa lanta i mantené negoshi (KvK Akademia), edukashon pa adulto via Forma, MBO ta ofresiendo mucha más posibilidat pa studia i desraoyá na Boneiru etc. Manera mi a indiká den mi diskurso di fin di aña e responsabilidat propio i outo disiplina ta elementonan importante ku nos tin ku sigui traha riba dje pa trese prosperidat pa nos mes i nos yunan. Nos tin tur ingrediente pa sigui krese i desaroyá komo pueblo Boneriano. Nos tur tin ku duna nos granito pa nos por krea e komunidat ku nos kier tin. No laga nos simplemente deseá otro bon aña pero puntra nos mes seriamente kiko mi por hasi pa hasi e aña di e otro un mihó aña. Tin biaha ta simplemente hasié un kustumber di duna un hende un komplimènt pa un kos bon ku e la hasi. Pa abo e no ta kosta nada pero pa e otro e por ta nèt e sosten ku e mester pa sigui desaroyá su potensial ku e tin i sigui krese den lokual ku e ta hasi.

Palabra ta konta! Ban ta konsiente kon nos ta ekspresá nos mes pa nos por tene otro responsabel pero ku e solo meta pa nos tur bira mihó di esaki. Mi ta uni mi mes pa no ta dividí riba e pida baranka aki. Pa nos uni más i bira un komunidat multi kultural; tur ku ta biba aki mester hasi nan máksimo esfuerso  pa aserká e otro ku rèspèt i ku gana di siña di e otro. Nos ta un isla inklusivo i esei pa mi ta nifiká ku nos tur ta traha riba e inklusividat aki. Papia ku otro, respetando otro su kultura, lenga i identidat. Ku e base aki nos por sigui pa dilanti i bira un pueblo ekonómikamente fuerte, pero más importante sosialmente Fuerte i uni.

Mi ta gradisí tur ku a kontribuí na nos isla den 2024, nos trahadornan den tur sektor entre otro di kuido, enseñansa i kuido pa mucha, riba tereno di seguridat nos polisnan, bomberonan, Kmar, nos ámtenarnan, trahadornan den konstrukshon etc. Mi ta spera di sigui konta ku e entousiasmo i tin biaha kon duru e por parse dal bai ku e bon trabou!

Nos a demonstrá, basá riba estudio hasí dor di CBS, ku nos tin un grado di felisidat haltu riba e isla aki. Esei ta kuadra ku e filosofia ku felisidat no ta un stashon ku bo ta yega òf ta simplemente un kos, pero felisidat ta un mentalidat.

Den 2025 boso por konta ku mi i ami ta konta ku bosonan.

Mi ta pidi tur hende pa hisa su kèlki pa deseá otro un felis aña I hopi salú.