Servisio di Kultura Arte i Literatura, SKAL, i Tourism Corporation Bonaire, ta organisá djabièrnè 22 di desèmber un festival di barí na Parke Wilhelmina. Di 6 or atardi pa 12 or anochi, vários grupo ta toka muzik ku ta pas den e tradishon di fin di aña. Yonchi Dortalina, konosí pa su komposishonnan den e tradishon di muzik di barí, ta presentá huntu ku e grupo musikal Tutti Frutti. E grupo lokal ‘Grupo Sababa’ ta toka tambú i muzik di barí.
‘Jom Gaiteros’ ta un grupo lokal di gaita ku tambe ta presentá. ‘Los paranderos’, un grupo di gaita di Kòrsou ta bin Boneiru spesialmente pa e evento. E grupo lokal ‘Grupo Rosina’ ta presentá ku un repertorio standart di kantika di Pasku.
E festival ta forma parti di un nochi di kompra spesial ku atrakshon na Parke Wilhelmina. Asina tin den e parke un stènt spesial ku esenanan di Pasku ku artista Ghislaine Monte a pinta.
For di djamars 19 di desèmber, bishitantenan por saka potrèt na e stènt ku background di Pasku. Den e parke tin tambe stènt ku kuminda i bibida delisioso, i stènt kaminda ta bende diferente artíkulo.
