SKAL, Sekshon di Kultura, Arte i Literatura di Entidat Públiko Boneiru, ta wak bèk ku orguyo riba un eksitoso Siman di Kultura, ku a tuma lugá na Boneiru di 22 pa 26 di yüni 2026. Durante sinku dia, e programa tabata dediká na selebrá, kompartí, i traspasá kultura boneriano. E interes grandi di habitantenan i bishitantenan ta mustra kon importante e siman di kultura ta pa Boneiru.
Kultura boneriano tabata sentral
Durante e siman di kultura, bishitantenan a sera konosí ku e kultura boneriano riku. Tabata paga atenshon na proverbionan lokal, platonan tradishonal, kustumbernan di ántes i e poder di yerba medisinal. Bishitantenan a siña tambe kon a pasa e konosementu akí pa generashonnan i ta usa esaki te awe.
E aktividatnan tabata dibertido i edukativo pa grandi i chikito. Di e manera akí, Siman di Kultura ta yuda tene kultura boneriano bibu i pasa esaki pa futuro generashonnan.
Huntu nos ta orguyoso di nos kultura
Siman di Kultura a trese habitantenan i bishitantenan huntu pa eksperensiá i kompartí e tradishonnan, konosementu, i balornan di Boneiru.
Danki na e programa variá, e organisashon a logra yega na un públiko amplio. E siman di kultura a sòru pa enkuentronan, konekshonnan, i un apresio mas grandi pa e kultura boneriano.
Preparashonnan pa 2027 a kuminsá
Despues di e edishon eksitoso akí, mesora e organisashon a kuminsá ku preparashonnan pa Siman di Kultura 2027. E énfasis akí ta riba:
- un programa mas grandi ku mas hende ainda por partisipá na dje;
- mas aktividat kaminda bishitante ta siña tokante kultura boneriano;
- un mihó konekshon ku otro eventonan kultural, manera San Juan i San Pedro.
Ku e plannan akí, SKAL tin komo meta pa sigui desaroyá Siman di Kultura den un evento anual importante ku ta hasi kultura boneriano visibel i ta pasa esaki pa futuro generashonnan.
