For di 10 te ku 15 di novèmber 2024 Boneiru ta den selebrashon di e Siman di Buki pa Mucha anual. E aña akí ku e tema ‘Lekker Eigenwijs’ òf na papiamentu ‘Est’ un Dushi Kabesura!’. Ku e tema akí Biblioteka Públiko Boneiru ke inspirá tur mucha di Boneiru pa sigui nan propio kaminda. I pa aseptá ku nan tur ta úniko na nan propio manera. No tene miedu di ta bo mes, ekspresá bo ideanan i sinti bo orguyoso di e persona ku bo ta! E aña akí e énfasis ta riba oumentá e plaser den lesamentu serka mucha pa medio di trese nan den kontakto tambe ku eskritornan.
Eskritornan i artistanan renombrá di Boneiru, Aruba, Kòrsou i Hulanda tin un un ròl importante. Manera e konosido kantante boneriano Luis Moka, e hóben sineasta Sendion Balentien i e eskritor Sharlon Willems. Willems a skirbi e regalo di Siman di Buki pa Mucha ‘Mil stap mas hundu: Pua i Ursi ta deskubrí un siudat’.
E artista kurasoleño Francis Sling i e eskritor Mercee Doran tambe lo duna nan aporte, meskos ku Loekie Morales, Zarissa Windzak, Tito Ansano i Kevin Hassing. E eskritornan i artistanan ta bishitá skol i nan ta tene tayer tambe. Asina e muchanan ta haña un oportunidat úniko pa bin den kontakto ku e eskritornan i e hendenan ku a pinta e pinturanan den e bukinan.
Esaki ta e programa di e Siman di Buki pa Mucha 2024:
Apertura di Siman di Buki pa Mucha
Riba djadumingu 10 di novèmber tin apertura festivo di e Siman di Buki pa Mucha na Kolegio Rayo di Solo. For di 16:00 or te 19:00 or mucha entre 4 i 12 aña por partisipá na un atardi yen di dibertishon ku lesamentu i aktividatnan emoshonante. Esaki ta primintí di bira un atardi inolvidabel ku vários wéspet spesial i hopi sorpresa. Durante e apertura un fantasia riku i plaser den lesamentu ta para sentral. Tur mucha i nan mayornan ta kordialmente bon biní pa partisipá i huntu selebrá e magia di storia.
Kompetensia di potrèt
E aña akí pa promé bes ta tene un kompetensia di potrèt pa skol, ku e nòmber ‘Est’un Dushi Kabesura riba Potrèt!’. Ta reta e skolnan pa nan ta mas kreativo posibel i pa saka un potrèt original ku ‘Est’un dushi kabesura!’ komo tópiko. E klas ganadó ta risibí un preis spesial pa e bibiloteka di skol. E premio ta pa tur alumno di tur edat i interes.
Tayer
Pa mayornan tin un tayer ku vários tep tokante kon nan por sostené nan yunan kabesura. I kiko nan por hasi pa nan yu bira sigur di su mes. Hóbennan por partisipá na un podcast. Den e podcast nan ta konta otro kon nan por ta kabesura na un manera positivo. Pa e muchanan tin un klup di lesamentu kaminda nan por lesa buki i papia tokante esakinan. Tin un fiesta di arte tambe kaminda na diferente manera nan por ta kreativo. Na final di e Siman di Buki nan ta pasa un pelíkula ku ta basá riba un buki pa mucha.
