Alumnonan di Sentro Integral pa Mucha (Integraal Kind Centrum /IKC) Kristu Bon Wardador (KBW) a sera aña eskolar na un manera spesial ku Mundialito. E torneo di futbòl akí a trese huntu alumnonan di grupo 5 te ku 8, maestronan i personal di e skol den un siman yená ku deporte, kolaborashon i plaser.
E idea pa Mundialito a bini di dosente di gemnastik Rendelon Martina. Inspirá pa Kopa Mundial di futbòl, e ker a ofresé alumnonan un siere deportivo i festivo di aña eskolar. Loke a kuminsá komo un idea simpel, a krese bira un evento grandi pa henter skol.
Pa realisá su plan, Martina a buska kolaborashon ku Entidat Públiko Boneiru (EPB), Indebon i vários spònser. Danki na nan sosten, por a organisá Mundialito. Tur ekipo a hunga den un unifòrm apropiá, loke a pèrkurá pa un ambiente real di Kopa Mundial.
Durante Mundialito, na kua tambe alumnonan di Klas di Idioma Internashonal (Internationale Taalklas /ITK) i SG a partisipá, kada klas di grupo 5 te ku 8 a representá un pais. E ekiponan a hunga den e kolónan di e pais ku lòt a disidí pa nan. Ademas di e torneo di futbòl, alumnonan i maestronan a partisipá na vários aktividat di deporte, manera un kompetensia di tene bala den laira, un kompetensia di pinalti i otro retonan deportivo.
Meta di Mundialito tabata pa sera aña eskolar na un manera deportivo i festivo. Deporte, rèspèt, kolaborashon i plaser tabata sentral. Na mes momentu, alumnonan, maestronan i personal a haña oportunidat pa konosé otro mihó na un otro manera.
EPB ta sostené inisiativanan ku ta kontribuí na un estilo di bida salú, desaroyo di talento, inklushon i kooperashon bou di hóben. Mundialito ta un ehèmpel bunita di esaki. EPB ta ekspresá su apresio pa e esfuerso i kreatividat di dosente di gemnastik Rendelon Martina i ta gradisí Indebon, spònsernan, personal di IKC KBW i tur boluntario ku a kontribuí na éksito di Mundialito. Huntu nan a pèrkurá pa un eksperensia inolvidabel pa alumnonan.
