Na luna di yüli 2024 entidat públiko Boneiru a duna un aktualisashon di kada 6 luna di e trabounan planiá pa loke ta trata mantenshon di nos kamindanan. Ku fin di aña aserkando, un biaha mas entidat públiko Boneiru ta duna informashon di e trabounan di infrastruktura ku a keda ehekutá kaba i esunnan ku ta planiá. E presupuesto ku tabata disponibel pa aña 2024 a keda usá den su totalidat. Na aña 2024 en total a otorgá pa un suma di mas òf ménos 11,4 mion dòler na trabou.
Mantenshon di kaminda di asfalt
A hasi vários trabou di mantenshon na e kamindanan di asfalt. Kaminda tabata posibel a sera e burakunan di mas urgente. “Aunke e medida di mantenshon aki no ta kuadra kompletamente ku mi vishon di un aserkamentu efektivo, ta apliká esaki pa motibu di e mantenshon struktural atrasá na nos kamindanan. Ku esaki awor aki nos ta ofresé un alivio, miéntras via proyektonan mas grandi nos ta invertí den un mehorashon duradero di e kamindanan”, segun diputado Anjelica Cicilia.
Proyektonan di rekonstrukshon
Proyektonan di rekonstrukshon ku a finalisá na aña 2024 ta entre otro:
- Kaya Luna, Kaya Solo, Kaya Strea, Kaya Venus
- Kaya Felipe Clarinda, Kaya Haarlem, Kaya Den Haag
- Kaya Londres, Kaya Cyprus, Kaya Slovenia
- Kaya Rita
- Kaya Rubi, Kaya Amatista (finalisando)
- Kaya J.E. Nicolaas
E proyektonan menshoná aki ta representá un invershon total di mas òf ménos $5,2 mion den nos kamindanan, loke ta resultá den mas òf ménos 3,7 kilometer di kaminda renobá.
Proyektonan grandi pa kua a duna trabou na aña 2024, ta entre otro:
- Tanki di Matrimonio: ta kuminsá ku e trabounan den bario di Tanki di Matrimonio. Aki e énfasis ta riba fundeshi i desagwe di e área. Seguidamente ta bai pone klenku;
- Kaya Tre i bisindario: ta atendé ku desagwe di e área. Seguidamente ta pone klenku den e kayanan. Ta trata aki spesífikamente di Kaya Tre, Kaya Drùm i Kaya Bongo;
- Konektá Kaya Apelsina i Kaya Papaya ku Kaya M. Pourier: e proyekto aki ta den ehekushon kaba. Ta atendé ku e problemátika di desagwe rònt di e kayanan aki. Tambe ta pone klenku inkluso asera den e kaya;
- Reparashon di sierto partinan di kamindanan di asfalt: tin sierto partinan di Kaminda di Rincon ku tin mester di mantenshon èkstra. Den e periodo binidero ta bai drecha e partinan aki pa medio di kita e fundeshi i pone rant nobo di betòn, pone klenku kantu di kaminda i un kapa di asfalt nobo riba e kaminda;
- Kaya Proud: Asfaltamentu di Kaya Proud lo tuma lugá pa medio di un kontrato estilo Design & Build (D&B), kaminda responsabilidat pa tantu diseño komo ehekushon di e proyekto ta serka e kontratista. Mirando ku destahonan estilo D&B ta un método nobo pa Direktorado di Planifikashon i Desaroyo i e kontratistanan na Boneiru, e aspekto hurídiko ta un parti esensial di e prosedura di destaho. E destaho pa esaki lo tuma lugá na kuminsamentu di aña 2025.
Lo reanudá e trabounan menshoná aki despues di fakansi di e sektor di konstrukshon i pa un gran parti nan lo keda finalisá den e promé kuartal di aña 2025. Ku e proyektonan aki nos ta invertí en total mas òf ménos $3,8 mion den nos kamindanan, loke ta resultá den mas òf ménos 4,6 kilometer di kaminda renobá.
Trabou di mantenshon na roi i dam
Durante e mantenshon atrasá grandi na damnan riba nos isla, a atendé ku en total 20 dam den luna di ougùstùs i sèptèmber. Ta trata di e siguiente sistemanan di dam:
|
|
|
|
|
|
|
|
|
|
|
|
|
|
|
|
|
|
|
|
Ku e dam di Onima por ehèmpel a atendé ekstensamente, i aktualmente nan ta trahando riba restorashon di e bordonan natural eksistente, di manera ku por warda e awa den un forma mas mihó. Relashoná ku e temporada di áwaseru pa aña 2024 a hasi mantenshon grandi tambe na e roinan vital di desagwe riba nos isla. Ta trata aki di e siguiente sistemanan di roi:
| Playa |
|
|
|
|
|
|
|
|
|
|
|
|
|
|
E sistemanan di roi na Rincon den e di dos kuartal a haña mantenshon kompleto.
Trabou di mantenshon na e sistemanan di desagwe
Den e di tres i e di kuater kuartal di aña 2024 a dediká hopi atenshon na mantenshon di e sistemanan di desagwe na nos isla. A hasi reparashon urgente na konstrukshonnan di ingenieria hidróuliko i na vários sitio a solushoná problema di desagwe. A atendé ku e siguiente áreanan ku ta sensibel pa desagwe i ku durante temporada di áwaseru tur aña tabata okashoná keho i notifikashon:
- Kaya International na altura di Port Bonaire;
- Krusada Kaya Sirena/Kaya America;
- Krusada Kaya Antonio Neuman;
- Kaya Gobernador N. Debrot (na altura di Bamboe Bali);
- Kaya Gobernador N. Debrot (Kaya Antonio Neuman te ku Parke Tului);
- Sistema di desagwe Kaya J.E. Nicolaas te ku un parti di Kaya Prinsès Marie.
Konstrukshonnan di desagwe
Ehekushon di diferente trabou di ingenieria sivil riba tereno di mantenshon i tambe e trabounan di rekonstrukshon di nos kamindanan, a kondusí na remplaso di vários labadó. Esaki pa salbaguardiá siguridat, fluho di tráfiko i fluho di awa di yobida. A ehekutá trabou di rekonstrukshon den Kaya Sabana, Kaya Boneiru, Kaya Amsterdam i Kaya Maria C. Hellmund.
Trabou di kapplug
Den e di dos kuartal di e aña aki a kuminsá ku un trayekto pa revisá i optimalisá maneho i mantenshon di vegetashon. Den e kuadro aki a lansa un proyekto piloto, ku a keda finalisá eksitosamente i ku a duna resultadonan balioso.
E resultadonan ku a logra ta forma e base pa stipulashon di un manual nobo pa manehá strukturalmente ku vegetashon i pa fortifiká e struktura di mantenshon i hasi esaki mas efektivo. Ku esaki no solamente ta garantisá kontinuidat, pero tambe e kalidat rekerí.
E trayekto aki ta marka un paso importante den direkshon di un aserkamentu duradero i efektivo di maneho di vegetashon, ku un enfoke riba solushonnan ku ta resiliente i efisiente pa futuro. Nos ta kontinuá ku esaki den aña 2025.
Fondonan adishonal pa kamindanan di Boneiru
Den luna di sèptèmber di e aña aki, ministerio di Asuntunan Interno i Relashonnan den Reino a anunsiá ku gabinete hulandes ta pone € 16 mion disponibel pa mehorashon di kamindanan di Boneiru. Esaki ta duna Entidat Públiko Boneiru un impulso finansiero èkstra pa por bai plania nos trabounan di infrastruktura pa e añanan binidero den un forma struktural. Un ambishon importante ta por ehèmpel mehorashon di e konekshon entre Rincon i Playa. “Aktualmente nos ta trahando duru riba prioritashon i planifikashon pa aña 2025. Despues di informá Konseho Insular, Entidat Públiko Boneiru lo kompartí mas informashon tokante kiko boso por verwagt pa otro aña”, segun diputado Anjelica Cicilia.
Finalmente nos ta supliká tur hende kordialmente pa tene kuenta ku e trabounan i eventual molèster ku por surgi pa motibu di esaki. Pa pregunta òf notifikashon tokante e trabounan boso por tuma kontakto ku civielewerken@bonairegov.com.
