Dentro di poko entidat públiko Boneiru ta bai kuminsá ku ehekushon di diferente trabou públiko riba tereno di mantenshon i tambe trabou di rekonstrukshon di nos kamindanan. Pa medio di esaki gustosamente nos ta informá bo tokante e trabounan ku nos tin planiá.
Trabou di mantenshon na roi i dam
Lo kontinuá ku e trabounan ku nos a kuminsá kuné relashoná ku mantenshon di roi. Ta trata akí di:
- E roinan for di e parti nort di Kaminda Gurubú te na Kaya Internashonal.
Banda di esaki lo dediká atenshon tambe na mantenshon di tur dam ku ta seku i pa kua mantenshon ta nesesario.Ta trata akí di partikularmente:
- E damnan rònt di Rincon i algun dam for di Kaminda Seru Largu te Kaminda di Lac.
Mantenshon i mehorashon di sistema di desagwe di awa di yobida
Durante e próksimo simannan lo dediká atenshon na reparashon i mantenshon di algun sistema di desagwe di awa di yobida. Ta trata akí prinsipalmente di mantenshon i reparashon di sistemanan eksistente di desagwe di awa di yobida a lo largo di nos kostanan. Spesífikamente ta trata akí di e siguiente sistemanan di desagwe di awa di yobida:
- for di Kaya Prinsès Marie den direkshon di Kaya Boneiru,
- a lo largo di Kaya Betico Croes,
- for di ‘Subway’ i Kaya Grandi,
- esun di Kaya Internashonal na altura di Port Bonaire,
- esun di E.E.G. Boulevard for di Bachelor’s Beach den direkshon di Pùnt Firkant,
- esun di Kaya Frater Odulfinus,
- for di Kaya Antonio Neuman den direkshon di Kaya Gobernador N. Debrot i Kaya Grandi den direkshon di Parke Tului.
- for di Kaya Gobernador N. Debrot na altura di Habitat,
- na altura di Kaya Sirena i Kaya Amérika.
Reparashon di segmento di kaminda di asfalt
Tin sierto segmentonan di Kaminda di Rincon ku tin mester di mantenshon èkstra. Den e periodo binidero ta bai drecha sierto segmentonan pa medio di kita e fundeshi, pone rant nobo di betòn. Ta bini klenku riba e parti kantu di kaminda, i e kaminda mes ta haña un kapa nobo di asfalt.
Rekonstrukshon i asfaltamentu di kaminda
Ta bai kuminsá tambe ku trabounan públiko grandi. Ta trata akí di e siguiente kamindanan spesífiko:
Tanki Matrimonio
Ta kuminsá ku trabou den bario Tanki Matrimonio. Akí e énfasis ta riba fundeshi i desagwe di e área. Seguidamente ta pone klenku den e kayanan.
Kaya Tre i bisindario
Ta bai atendé ku desagwe di e área. Seguidamentu ta pone klenku den e kayanan. Ta trata akí di spesífikamente Kaya Tre, Kaya Drùm i Kaya Bongo.
Konektá Kaya Apelsina i Kaya Papaya ku Kaya M. Pourier
Ta bai atendé ku e problemátika di desagwe di awa di yobida. Tambe ta bai pone klenku den e kayanan akí, inkluso un asera ku klenku.
Kaya Proud
Den Kaya Proud tambe ta bai atendé ku e desagwe. Seguidamente lo tuma lugá un restrukturashon di e kaminda, pa hasi e kaya akí mas habitabel.
Mantenshon di kaminda di asfalt
Tambe lo bai hasi mantenshon na e kamindanan di asfalt, pa medio di sera buraku kaminda esaki ta posibel. A tene kuenta ku e impakto ku esaki lo tin riba tráfiko, i e mantenshon lo tuma lugá na momentunan stratégiko, di manera ku e inkumbiniensia pa usuarionan di e kamindanan ta keda minimalisá.
Den e próksimo simannan i lunanan, ku regularidat nos lo publiká e aktualisashonnan nesesario relashoná ku e áreanan di trabou riba medionan sosial, bou di e nòmber ‘R&O den akshon’.
Kordialmente nos ta supliká tur hende pa tene kuenta ku e trabounan akí i e eventualnan interupshonnan ku por surgi komo konsekuensia di esaki. Pa pregunta òf notifikashon tokante e trabounan akí, bo por tuma kontakto ku civielewerken@bonairegov.com.
No lubidá di sigui nos página Gobiernu di Boneiru pa aktualisashonnan i informashon direkto.
