Dia 28 i 29 di yüni den oranan di mainta tabatin treinen operashonal den haf di Playa. Rijkswaterstaat den kolaborashon ku Stinapa, Entidat Públiko Boneiru i Kompania di Tou Boneiru (KTB) a organisá e treinennan operashonal akí i nan ta enfoká riba para kla i sa kon pa aktua na momentu di un eventual Oil Spill, derame di petroleo. Nan a trein ku material pa kombatimentu di petroleo den haf di Playa. Esaki di manera ku tur partido ta kla prepará, den kaso ku berdaderamente tin un insidente.
Kombatimentu di petroleo den laman rònt di e islanan BES ta responsabilidat di Rijkswaterstaat Zee i Delta. For di 1 di mei na Boneiru i for di 1 di yüni na Sint Eustatius i Saba, KTB a kuminsá ku ehekushon di e kontratonan ‘stand by’ pa Servisio di Reakshon riba Insidentenan Marítimo na Hulanda Karibense. E kontrato ta enserá disponibilidat di un barku di reakshon, ehekushon di ehersisio i mantenshon di e ekipo pa kombatimentu di petroleo ku ta stashoná na Sint Eustatius, Saba i Boneiru. E kontrato ta konsistí di dos parsela, unu na Islariba i unu na Boneiru. Un ‘IMO 2 certified training’ ta parti di e programa, ku Oil Spill Response Limited for di Fort Lauderdale ta duna na empleadonan di KTB i personal di haf di Boneiru. Kontenido di e treinen ta pa akumulá konosementu básiko, tantu teórikamente komo práktikamente riba tereno di kombatimentu di petroleo den e sentido mas amplio di palabra.
