A base di mensahenan resien internashonal tokante diferente kaso di e vírus di hanta riba un barku krusero, GGD Bonaire / Salubridat Públiko di Entidat Públiko di Boneiru ta informá ku e riesgo pa Boneiru i e region karibense ta masha abou na e momentu akí.
E mensahenan ta trata tokante un brote di e vírus di hanta riba un krusero di ekspedishon ku a nabegá banda di Sur-Amérika i den oséano Atlántiko. Algun pasahero i miembro di tripulashon a bira gravemente malu i tambe tin personanan ku a fayesé.
No tin kaso di e vírus di hanta konfirmá na Boneiru. Tampoko no tin señalnan ku e vírus ta plama den e region karibense.
Segun Caribbean Public Health Agency (CARPHA) i e Wereldgezondheidsorganisatie (WHO), e riesgo pa e region ta masha abou na e momentu akí.
E vírus di hanta ta bini dilanti solamente serka algun roedor (animalnan manera raton, djaka, etc.) E tipo di vírus ku a konfirmá na e brote akí, ta sosodé spesialmente den partinan di Chile i Argentina i ratonnan i djakanan salbahe ku ta biba einan por pasa e vírus over. No tin e roedornan akí na Boneiru.
Kontaminashon ta sosodé mayoria biaha via kontakto ku urina, sushi òf skupi di e roedornan infektá, por ehèmpel dor di inhalá stòf den e áreanan infektá. Transmishon di persona pa persona ta masha raro i ta sosodé den situashonnan eksepshonal kaminda tabatin kontakto serka i pa un periodo largu.
Tambe e riesgo pa un pandemia ta masha chikitu segun e organisashonnan di salubridat internashonal, pasobra e vírus di hanta no ta plama fásil entre hende.
GGD Bonaire / Salubridat Públiko ta sigui e situashon den kolaborashon ku CARPHA, RIVM i WHO i lo informá pueblo, si tin motibu pa esaki.
