Dia 11 i 12 di desèmber Biblioteka Públiko Boneiru riba petishon un biaha mas ta organisá un charla grátis pa mayornan tokante mucha i uso seif di medionan sosial. E eksperto di medionan sosial Flavina Wanga ta tene e charla na sentro di bario Amboina. Riba djárason 11 di desèmber e charla ta di 19:00 or pa 21:00 or na hulandes i riba djaweps 12 di desèmber di 9:00 or pa 21:00 or na papiamentu. Wanga ta duna e mayornan vários tep útil tokante kon nan por guia nan yunan ku uso di medionan sosial. Den e charla e ta trata tópikonan tambe manera tèrmentu via medionan sosial (cyberbullying), sexting (interkambiá mensahe, potrèt, video etc. ku kontenido seksual), i hende ku ta lòk mucha online. Entrada pa tur dos charla ta grátis. Mayornan por registrá via app na e number di telefòn 770 6302 òf via un email na eventsbibliotekapubliko@bonairegov.com
Den luna di òktober Wanga a tene un charla kaba tokante uso seif di selular, tèblet, internèt etc. serka mucha. E interes pa esaki tabata hopi grandi. Pa e motibu akí biblioteka a disidí pa bolbe organisá e charla. Na Boneiru pa basta tempu kaba tin preokupashon tokante uso di telefòn selular serka hóbennan. For di investigashon ta resultá ku mas ku 90% di nos hóbennan ta hasi uso diario di medionan sosial. Hopi mayor ta haña difísil pa tene bon supervishon riba esaki. Nan ta haña fastioso tambe pa guia nan yu ku uso di medionan sosial.
Ku su empresa ‘Konsiente’ pa seis aña kaba Wanga ta ofresé tayer na Kòrsou tokante medionan sosial i hóbennan pa mayornan, dosentenan i otro edukadornan. El a krea tayer tambe ku ta spesial pa hóbennan pa siña nan kon na un manera responsabel i seif nan por hasi uso di medionan sosial. E meta ta pa siña nos muchanan i hóbennan tuma desishon korekto ora nan ta online.
