Departamento di Agrikultura, Krio di Bestia i Peskeria (LVV) Boneiru ta invitá tur piskadó i otro interesadonan pa un reunion tokante peskeria na Boneiru. E reunion akí ta tuma lugá dia 13 di novèmber 2024 na Captain Don’s Habitat (sala di konferensia Aquarius).
E aña akí LVV Boneiru, huntu ku Wageningen Marine Research (WMR) a kuminsá ku un investigashon di peskeria pa identifiká e sektor di peskeria na Boneiru i sigui desaroyá esaki. Durante e reunion dr Dolfi Debrot di WMR lo presentá e resultadonan di e investigashon sientífiko; un investigashon amplio di e situashon aktual di peskeria i e populashonnan di piská na Boneiru. E resultadonan di e investigashon akí ta brinda konosementu balioso ku ta relevante pa tantu e piskadónan komo esnan enbolbí den sektor di peskeria.
Yamada na piskadónan i interesadonan
LVV ta enkurashá tur piskadó i tur hende ku ta interesá den futuro di peskeria na Boneiru pa asistí na e reunion akí. Bo presensia i aporte ta di gran importansia pa duna forma na un sektor di peskeria duradero ku ta na bienestar di nos isla.
Informashon práktiko:
- Fecha: 13 di novèmber 2024
- Sitio: Captain Don’s Habitat, sala di konferensia Aquarius
- Ora: 19:00 or – 20:30 or
