Siudadanonan tin un ròl i responsabilidat mas grandi awor den investigashon di fuente i kontakto ora un hende tèst positivo pa COVID-19. Ta pidi personanan ku tèst positivo pa nan mes avisá nan kontaktonan estrecho i e hendenan ku ta biba huntu ku nan den kas pa bai den karentena i bai hasi tèst despues. Esaki departamento di Salubridat Públiko a anunsiá.
Pa motibu di e kantidat haltu di kontagio e departamento no ta logra mas pa hasi un investigashon di fuente i kontakto ekstenso. Salubridat Públiko ta yama e hendenan ku a tèst positivo promé. Asina e departamento ta sòru pa e personanan akí keda den isolashon i pa nan no por plama e vírùs. Despues nan ta yama e hendenan ku a tèst negativo. Por sosodé ku pa motibu ku nan ta hopi okupá ta dura mas largu ku normal promé ku nan yama e hendenan ku a tèst negativo.
Siudadanonan ku tèst positivo ta haña un karta den kua Salubridat Públiko ta splika ken nan ta konsiderá komo hende ku ta biba huntu den kas i ken ta kontakto estrecho. Hende ku ta biba huntu den kas ta hende ku ta biba den e mesun kas i ta kompartí espasionan manera baño, kushina, kamber di drumi ku otro.
Si denter di 24 un hende tabatin pa mas ku 15 minüt kontakto ku e persona ku a tèst positivo i e distansia tabata ménos ku 1,5 meter, nos ta papia e ora ei di un kontakto estrecho. Tin ora un hende por kore riesgo tambe, miéntras e tabata ménos ku 15 minüt den kontakto ku un persona ku tabata kontagiá. Esei ta pasa ora ku tosa den kara di un persona òf ora di duna sunchi.
Hendenan ku ta biba huntu den kas i kontaktonan estrecho mester bai tèst 5 dia despues di e último kontakto ku e persona kontagiá. E dia ku un persona tabatin kontakto pa último biaha, ta dia 0. E ora ei serka esei ta konta sinku dia i riba e di sinku dia ei, e persona tin ku bai tèst. Si e último kontakto tabata riba djárason, e ora ei e persona tin ku bai tèst riba djaluna. Hendenan ku ta biba huntu den kas i kontaktonan estrecho por yama 0800 0800 pa un sita pa bai tèst.
