Riba djawebs 11 di sèptèmber den oranan di mainta e hefe di INDEBON Terrence de Jongh huntu ku diputado di deporte Peter Silberie tabata presente na Parke Tului pa pa pone nan mes na altura di e trabounan ku ta tumando lugá. Durante di inspekshon di e trabounan na Parke Tului, Terrence de Jongh a duna di konosé ku e parke lo habri bèk entre fin di òktober i komienso di novèmber, despues di a haña un renobashon total.
Diputado Peter Silberie a trese dilanti ku e parke lo ta un parke bunita pa famianan por trese nan yunan bin dibertí, kaminda e parti ku aparato pa mucha hunga ta bira mas amplio. Sr Silberie a hasi un yamada riba tur habitante i bishitante pa yuda kuida Parke Tului i ten’é bunita. Segun diputado Peter Silberie den futuro tur otro parke tambe ta bai haña renobashon i tambe nos vèltnan di deporte ta bai haña e atenshon nesesario.
Un detaye remarkabel ta ku riba un di e potrètnan por mira sr Francis Wanga i diputado Peter Silberie kendenan ámbos den pasado tabata hefe di Indebon, pará banda di Terrence de Jongh ku ta e aktual hefe di Indebon.
