Djabièrnè tras di lomba reapertura di Pos Fontein a tuma lugá. Ku e reapertura ofisial akí a selebrá restorashon eksitoso di e pos, un paso importante den e proyekto mas amplio pa restorá tur pos tradishonal na Boneiru. Ademas di e restorashon di e pos, a konstruí tambe un tanki di awa i a instalá un pòmp di awa ku ta funshoná ku energia solar, hasiendo e suministro di awa mas sostenibel i mihó.
Durante e inougurashon diputado Clark Abraham a aksentuá importansia di e esfuersonan akí: ‘Ku restorashon di e posnan akí nos ta fortifiká sektor di agrikultura i nos ta aportá na mas outosifisiensia pa nos kunukeronan. Esaki ta un invershon den nos komunidat i den nos futuro.’
Maurice Adriaans, hefe di e departamento di Agrikultura, Krio di Bestia i Piskamentu (LVV), tambe a suprayá balor di e trabounan di restorashon: ‘Pos Fontein ta un fuente importante pa e kunukeronan di Tra’i Montaña. Danki na e renobashon nan por bin saka awa na un manera efisiente i sostenibel atrobe. Nos ta sigui komprometé nos mes pa paso pa paso restorá tur pos tradishonal na Boneiru.’
Entidat Públiko Boneiru ta anunsiá ku a finalisá restorashon di Pos Fontein eksitosamente. E trabounan di restorashon ta forma parti di e inisiativa mas amplio pa restorá tur pos tradishonal na nos isla pa pone nan bèk den nan estado original i hasi nan funshonal atrobe.
Ku finalisashon di e trabounan na Pos Fontein, un biaha mas nos a hasi un fuente balioso di awa aksesibel. Awor akí e pos ta brinda akseso konfiabel na awa pa e kunukeronan den bisindario di Tra’i Montaña, di manera ku nan por kontinuá ku nan aktividatnan di agrikultura na un manera mas efisiente.
Anteriormente e aña akí e siguiente posnan tambe a keda kompletamente restorá i mehorá:
- Pos Wanapa
- Dos Pos
- Pos Kavula
E posnan aki ta ekipá ku energía solar, di manera ku e proseso di pòmp i saka awa ta kana hopi mas efisiente.
Entidat Públiko Boneiru ta sigui invertí den mantenshon i restorashon di fuentenan tradishonal di awa, ku no ta solamente histórikamente di balor grandi, pero ku ta esensial tambe pa sektor di agrikultura i pa outosufisiensia di Boneiru.
