Entidat Públiko Boneiru ta invitá públiko pa partisipá na e Konmemorashon di Abolishon di Sklabitut riba djárason 1 di yüli 2026. Durante e anochi akí, lo reflehá riba un momentu importante den historia, i lo duna homenahe na e forsa, dignidat i herensia di e hendenan ku a biba bou di e sistema di sklabitut.
E programa ta tuma lugá di 17:30 pa 21:00 riba e lugá di parker di Kolegio Ehekutivo. E ta kuminsá 17:30 i ta dediká na konmemorashon i ekspreshon kultural. Lo tin diskursonan i momentunan di reflekshon, siguí pa e seremonia ofisial di konmemorashon ku un minüt di silensio i ponementu di krans. Banda di esei lo tin kontribushonnan kultural. Pa medio di músika, arte, i palabra lo reflehá riba e nifikashon di libertat i kon nos antepasadonan boneriano a lucha pa e libertat akí, i kiko e impakto di esaki ta riba nos sosiedat aktual.
Ta pidi bishitantenan pa tene kuenta ku e reglanan vigente di tráfiko i parker. Por fabor stashoná solamente den e áreanan indiká. Esaki ta nesesario pa e konmemorashon por tuma lugá na un manera sigur i ordená i pa evitá ku ta blòkia kaminda i pasashinan.
Dia 1 di yüli 2026, nos ta konkluí un Luna di Emansipashon eksitoso. Laga nos tuma e forsa ku tur e aktividatnan ku a tuma lugá durante Luna di Emansipashon a duna nos, pa huntu sigui konstruí un futuro briante i di igualdat. Entidat Públiko Boneiru, huntu ku nos partner lokal Mangazina di Rei, ta invitá tur habitante pa reflehá riba e nifikashon di libertat, igualdat i konekshon i pa konmemorá e dia importante akí huntu.
Luna di Emansipashon a bira posibel ku sosten di Entidat Públiko Boneiru, Ministerio di Enseñansa, Kultura i Siensia i e Komishon di Konmemorashon di Pasado di Sklabitut.
