For di 1 di aprel 2024 e Dekreto di Establesimentu i Aktividat BES ta na vigor. Den e dekreto akí nan ta regla kiko un empresa mester hasi pa protehá medio ambiente. Dependiente di e tipo di empresa, empresanan mester duna di konosé si nan ta den poseshon di un pèrmit di medio ambiente òf nan tin ku hasi petishon pa esaki.
Pa duna tantu e empresanan komo gobièrnu oportunidat pa sòru ku tur kos ta kana sin problema, ta atendé paso pa paso ku introdukshon di e reglanan. A skohe pa implementá introdukshon di e reglanan pa kada sektor apart.
For di djaluna 25 di novèmber 2024, tantu empresanan di hóreka komo kompanianan di konstrukshon por hasi un notifikashon i/òf identifiká nan mes komo un empresa ku tin obligashon pa disponé di un pèrmit. E notifikashon òf e identifikashon komo empresa ku tin obligashon pa disponé di un pèrmit ta un obligashon legal i no ta sin kompromiso.
Por hasi e notifikashon via e wèpsait di entidat públiko Boneiru (www.bonairegov.com) òf via wèpsait di e Punto di Informashon Medio Ambiente (www.infomilCN.com).
Despues di a hasi e notifikashon, e empresanan ta haña un konfirmashon ku e notifikashon a keda registrá. Despues di e registrashon un inspektor di Direktorado di Supervishon i Mantenshon di Lei lo hasi un inspekshon inisial. Durante e inspekshon akí e inspektor lo informá e empresa tokante e forma den kua mester duna kontenido na e reglanan di medio ambiente.
Den kaso ku e empresa tin mester di un pèrmit, e ora ei un dunadó di pèrmit di Direktorado di Planifikashon i Desaroyo lo tuma kontakto pa atendé ku e ‘intake’ mas aleu.
Empresanan eksistente ku no ta empresa di hóreka òf un kompania di konstrukshon, ainda no tin mester di registrá. Despues nan ta haña invitashon pa registrá nan mes.
Sinembargo, empresanan nobo den tur kaso for di 25 di novèmber 2024 mester registrá nan mes via e formulario elektróniko.
Djaluna mainta sra van Rijn, direktor general di ministerio di Infrastruktura i Maneho di Awa, huntu ku diputado Cicilia ofisialmente a lansa e prosedura digital di registrashon.
