E trabounan di mantenshon na Kaminda di Rincon ta sigui ku inisio di e trabounan na e segundo vak di mantenshon. E promé vak ku a ser repará na Kaminda di Onima ku ta konektá ku Bulevar Miguel A. Pourier, a ser finalisá eksitosamente. Awor e trabounan ta enfoká riba mantenshon di e di dos parti ku ta dañá riba e kaminda akí. Ta trata akí di e parti di Kaminda di Rincon ku ta kuminsá mas òf ménos 800 meter despues di e bògt di Onima i ku ta terminá promé ku e krusada kaminda ta kita bai direkshon di Boka Onima (Kaminda Brudernan di Brakapoti).
E trabounan na e di dos parti di e trabou di mantenshon a kuminsá riba djárason 5 di mart 2025 i lo realisá nan den fase, pa mas tantu posibel minimalisá interupshon di e fluho di tráfiko. E kaminda ta keda aksesibel pa tur tráfiko, pero nos ta bolbe supliká usuarionan di e kaminda pa ta kouteloso, pa sigui indikashon di desviashon i tambe pa ahustá e velosidat.
E trabounan di mantenshon riba henter Kaminda di Rincon ta planiá te ku luna di yüni 2025. Durante e periodo akí e kaminda ta keda aksesibel pa tur tráfiko. Pa minimalisá molèster, nos ta ehekutá e trabounan den diferente fase, teniendo kuenta ku dianan di fiesta i eventonan kultural.
Durante e periodo akí, ta keda aktualisá e informashon disponibel via e wèpsait di gobièrnu i kanalnan di medionan sosial ku regularidat, di manera ku usuarionan di e kaminda ta keda na altura di e progreso i di e kambionan spesífiko den tráfiko.
Nos ta gradisí bo pa bo pasenshi i koperashon i nos ta sigui traha duru pa un ret di kaminda mas seif i mas duradero na Boneiru.
