Luna pasá Gezaghèber di Boneiru a informá habitantenan di Boneiru tokante su kontakto kontinuo ku Ministerio di Asuntunan di Eksterior i Ministerio di Defensa. Nan ta kontinuá semanalmente ku e kontakto akí, kaminda nan ta papia entre otro tokante e desaroyonan aktual. Ministerio di Defensa ta enfatisá ku e tenshonnan den region na e momentu akí no ta forma un menasa direkto pa e islanan ABC, i pues pa Boneiru tampoko. Mas aleu Defensa ta indiká ku e operashon merikano Southern Spear ta un operashon militar dirigí nashonalmente di Merka. Esaki ta nifiká ku Reino Hulandes, i pues Defensa tambe, no ta enbolbí ku esaki. Defensa ta vigilá e desaroyonan minusiosamente.
Banda di esaki Gezaghèber ta enfatisá ku for di entidat públiko Boneiru mas i mas nan ta trahando riba resiliensia di nos komunidat. Esaki ta tuma lugá entre otro pa medio di elaborashon di diferente senario i plan pa por dominá eventual konsekuensianan di e krísis adekuadamente. Esaki ta konta tambe pa un situashon kaminda logístika pa loke ta trata nos isla eventualmente lo por keda opstakulisá. Gezaghèber, huntu ku e organisashon di krísis di entidat públiko Boneiru, ta hiba kòmbersashon ku partnernan lokal, regional i di Reino pa prepará diferente senario. Entidat públiko Boneiru ta traha tambe riba preparashon di nos habitantenan pa nan por yuda nan mes mas mihó riba tur tereno na momentu di situashonnan di emergensia. Teniendo kuenta ku un mundu ku ta kambiando rápidamente ku preokupashon tokante tur tipo di tópiko, for di kambio di klima te siguridat sibernétiko, nos ta trahando pa pèrkurá ku komo komunidat nos ta mihó prepará pa kualke situashon.
