Su Altesa Real Prensès Beatrix, Protektora di Dutch Caribbean Nature Alliance (DCNA), ta bishitá Boneiru i Sint Eustatius for di 18 pa 21 di novèmber 2025, pa selebrá e kompromiso di e islanan akí ku konservashon di naturalesa i e inisiativanan di komunidat. E bishita ta tira lus riba restorashon di medio ambiente i proyektonan sosial ku ta konektá hende ku naturalesa den henter Karibe Hulandes. Durante su bishita, DCNA lo fiha atenshon riba importansia di e sinku habitatnan di mas importante - ref di koral, kama di yerba di laman, palu di mangel, mondi seku tropikal i mondi húmedo tropikal. E habitatnan akí tambe ta forma parti di e Programa di Konservashon i Restorashon di e Habitatnan di mas Importante ku DCNA a lansa resientemente, un inisiativa di henter e region pa protehá i restorá e ekosistemanan mas vital di Karibe Hulandes.
Boneiru
Su Altesa Real ta kuminsá su bishita ku STINAPA Boneiru den Parke Nashonal Washington Slagbaai, un área salbahe protehá ku mondi di kadushi, saliña i terasa di kalichi ku ta duna refugio na algun di e espesienan mas ikóniko di Boneiru. E bishita ta koinsidí ku e Festival di Planta Palu, un evento anual di plantamentu di palu pa mucha di skol básiko ku ta selebrá amor pa naturalesa. E Prensès lo planta un palu huntu ku e muchanan, promé ku e hasi un rekorido den e parke ku personal di STINAPA pa siña tokante historia i nifikashon di e área, i tokante e trabou kontinuo di konservashon i restorashon.
Riba djárason, 19 di novèmber, e Prensès ta djòin Mangrove Maniacs na kosta sùit di Boneiru pa wak kon nan ta restorá mondi di palu di mangel ku ta protehá kosta i ku ta sirbi komo habitat krusial pa diferente espesie. Huntu ku STINAPA su Junior Rangernan, e Prensès ta planta un palu di mangel i e ta papia ku e rangernan tokante nan eksperensia ku protekshon di Boneiru su naturalesa.
E bishita ta kontinuá ku un parada na Reef Renewal Foundation Bonaire, kaminda algun miembro di personal lo demostrá sierto téknikanan di kultivo i transplante di koral ku ta yuda e refnan rekuperá di e impakto di kambio di klima. E Prensès ta hasi un rekorido den e laboratorio di koral pa opservá e diferente etapanan di kresementu di koral i e ta papia ku e investigadónan i boluntarionan tokante restorashon ku komunidat ta kondusí.
Durante su estadia na Boneiru, e Prensès ta bishitá tambe vários inisiativa kultural i edukativo, entre otro e parke di hunga nobo di Jantje Beton i un seshon hubenil di UNICEF na Biblioteka Públiko Boneiru.
Sint Eustatius
Riba djabièrnè, 21 di novèmber, Prensès Beatrix ta bishitá St. Eustatius, kaminda su programa ta enfoká riba reforestashon, biodiversidat i partisipashon di hóben. E ta kuminsá na e sitio di kultivo ReforeStatia, ku Sint Eustatius National Parks Foundation (STENAPA) ta manehá, kaminda nan ta kultivá palu i mata endémiko pa restorá mondi seku di e isla akí i pa kombatí eroshon. E Prensès lo tin un enkuentro ku Terrestrial Rangers ku lo ofres’é un rekorido atraves di e sitio di kultivo i duna splikashon tokante importansia di espesienan endémiko pa resiliensia di klima i biodiversidat.
Durante su bishita, Su Altesa Real ta risibí tambe un ‘briefing’ tokante protekshon di yuana antiano, un espesie endémiko ku awor akí ta seriamente bou di menasa di ekstinshon. Den presensia di e Prensès, un miembro di personal di STENAPA lo laga un yuana liber den naturalesa, simbolisando asina e esfuersonan kontinuo pa protehá bestia di mondi na Sint Eustatius.
Mas lat riba e dia akí, e Prensès ta bishitá Biblioteka Públiko tambe pa topa ku hóbennan ku ta enbolbí den e ‘Child Friendly Cities Initiative’ di UNICEF. Den oranan di atardi, Prensès Beatrix ta bishita ‘Government Guest House’, kaminda STENAPA lo papia tokante importansia di kolaborashon den maneho di medio ambiente i e konekshon entre kultura i naturalesa. E lo deliberá tambe ku vários representante tokante e tópiko aki. Huntu ku STENAPA i miembronan di komunidat, e Prensès ta planta un palu komo símbolo di e laso entre STENAPA i komunidat.
E bishita ta terminá ku apertura ofisial di Kings Well National Parks Center, e sede nobo di STENAPA. E fasilidat moderno aki lo sirbi komo sentro pa investigashon, konservashon di naturalesa i edukashon, ku un laboratorio marino pa sostené restorashon di koral. Prensès Beatrix lo hasi un rekorido den e laboratorio i e ta papia ku e Junior Rangernan tokante nan eksperensianan i tokante importansia di konservashon di naturalesa pa e futuro generashonnan.
Un aserkamentu regional: E Programa di e Habitatnan di mas Importante
E Bishita Real ta destaká e koperashon kresiente riba tereno di konservashon di naturalesa na Karibe Hulandes. Resientemente DCNA a lansa su Programa di Konservashon i Restorashon di e Habitatnan di mas Importante, un inisiativa di término largu ku ta uni tur e seis islanan, esta Aruba, Boneiru, Kòrsou, Saba, Sint Eustatius i Sint Maarten, bou di un strategia kompartí pa protehá i restorá sinku ekosistema krusial: ref di koral, kama di yerba di laman, palu di mangel, mondi seku tropikal i mondi húmedo tropikal.
E programa ku National Postcode Loterij, WWF-NL, i Bloomberg Philanthropies ta finansiá, ta hasi uso di normanan di konservashon rekonosé internashonalmente pa duna guia na akshonnan konhunto te na aña 2100. E tin komo meta pa fortifiká biodiversidat, mehorá resiliensia di klima, i sòru pa naturalesa sigui sostené tantu e habitantenan komo e ekonomianan di henter Karibe Hulandes.
Informashon pa medionan di komunikashon
Prensa lokal ku ke reservá un lugá, por fabor tuma kontakto ku:
Boneiru: Kenneth Charlemagne di Entidat Públiko Boneiru na Kenneth.charlemagne@bonairegov.com.
Sint Eustatius: Erik Boman di STENAPA na Info@statiapark.org i ‘Government Information Services’ di Entidat Públiko Sint Eustatius na gis@statiagov.com
