Entidat Publiko Boneiru kier enfatisá ku Playa Fòrn’i Kalki (Bachelor Beach) ta i lo keda aksesibel ku entrada pòrnada pa tur bishitante. Djabièrnè dia 1 di yüli, den un forma virtual, diputadonan James Kroon i Hennyson Thielman, a revelá desaroyo di Playa Fòrn’i Kalki riba página di Facebook di Gobièrnu di Boneiru.
Manera ta kustumber e posibilidat pa bo por bai ku bo mes refresko i kos di kome ta keda posibel na e bich. E bich ta unu públiko pues lo no por limitá ningun persona pa bini ku nan mes kosnan. Ku e diseño nobo kier hasi posibel ku bo por kumpra algu di kome of hür ekipo si bo ta deseá esaki.
A tene kuenta ku tur edat i gremio ku diseño di e bich. Lo bai tin entre otro un parke di hunga pa nos muchanan por dibertí nan mes i un trapi mas mihó i seif pa baha na e playa. Kiosko kaminda empresarionan lokal por bende nan produktonan i/òf hür ekiponan akuátiko. Es desir, un área multifunshonal kaminda bishitantenan por kumpra kos di kome i bebe, hasi uso di mesa di piknik i un edifisio ku fasilidat di baño i kaminda bo por kambia paña despues di un dia largu na bich.
“Ta importante pa desaroyo ekonómiko di nos isla pa krea posibilidat na nos lokalnan prosperá. P’esei ku e diseño pa Playa Fòrn’i Kalki nos kier duna eksklusivamente nos empresarionan lokal oportunidat pa bende nan servisio òf produktonan. Nos vishon ta pa krea un eksperiensia úniko i eksponé loke nos komo boneriano tin di ofresé na nos bishitantenan. Klaramente pa bo por hasi esaki bo mester ta empresario establesé na Boneiru i inskribí na Kamara di Komèrsio”, segun diputado di desaroyo ekonómiko i turismo Hennyson Thielman.
Pa hür kiosko òf okupá áreanan na e bich lo habri un destaho kaminda empresarionan lokal por entrega nan ideanan ku nan tin pa bich. Fecha di esaki lo keda anunsiá despues pa medio di e kanalnan di Entidat Públiko Boneiru.
Partnernan stratégiko involví den desaroyo di Playa Fòrn’i Kalki ta Tourism Corporation Bonaire (TCB), Telbo i e arkitekto lokal sr Gino Obersi. TCB ta bai keda responsabel pa maneho di e bich. Di e forma aki nos por garantisá ku e laman ta keda pa públiko i lo risibí konstantemente fondonan nesesario pa mantenshon di e bich. E otro partner stratégiko den desaroyo di e bich aki ta Telbo. Huntu ku Telbo ta bai sòru pa brinda konekshon di internet high speed pa asina bishitantenan di e bich por keda konektá.
Un partner stratégiko mas ta e arkitekto. Un arkitekto boneriano ku ta komprondé nos estilo i nesesidatnan di nos komo boneriano a hasi diseño di e bich. Manera ta kustumber e posibilidat pa bo por bai ku bo mes refresko i kos di kome ta keda. Lo no limitá ningun persona pa bini ku nan mes kosnan. E bich ta i lo keda un sitio públiko.
E diseño nobo lo bai hasi e bich mas aksesibel, mas organisá i mas bunita. Un di e aspektonan di mas importante den e totalidat aki ta mantenshon di e bich. Entidat Públiko Boneiru ta sumamente konsiente ku mester mantené e aspektonan natural i úniko di e bich i ta garantisá ku esakinan lo keda intakto. E bich ta i lo keda grátis i aksesibel pa públiko i lo risibí un facelift pa nos lokalnan i bishitantenan.
